عالمی امن کی بحالی کے لیے اقوام متحدہ کا کردار لائق تحسین ہے : جنرل سید عاصم منیر
اقوام متحدہ کے امن مشن کے وزارتی اجلاس کے حوالے سے ہونے والی تیاریوں کا جائزہ لینے کیلئے آج اجلاس کا انعقاد کیا گیا جس میں چیف آف آرمی سٹاف جنرل سید عاصم منیر نے اختتامی سیشن میں مہمان خصوصی کے طور پر شرکت کی۔
اجلاس میں اقوام متحدہ کے اعلیٰ حکام اور مختلف ملکوں کے مندوبین کے علاوہ سفارتی برادری کے اراکین بھی شریک ہوئے۔ اقوام متحدہ کے امن مشن کے تحفظ وسکیورٹی کے موضوع سے ہونے والے اس اجلاس کی میزبانی پاکستان اور جاپان نے مشترکہ طور پر کی۔
چیف آف آرمی سٹاف جنرل سید عاصم منیر نے اقوام متحدہ کے امن دستوں کو درپیش چیلنجز وخطرات کو اجاگر کرتے ہوئے اجلاس سے خطاب میںکہا کہ عالمی امن کی بحالی کے لیے اقوام متحدہ کا کردار لائق تحسین ہے ۔ اقوام متحدہ کو امن مشن کی قابلیت میں مزید اضافہ کرنا چاہیے تاکہ امن مشن میں ذمہ داریاں ادا کرنے والوں جوانوں کا تحفظ وسکیورٹی یقینی بناتے ہوئے خطرات سے موثر طریقے سے نپٹا جا سکے۔
آرمی چیف کا کہنا تھا کہ پاکستان کی خواہش ہے کہ اس خطے میں امن وامان قائم ہو اور ٹرانزٹ، تجارت اور سرمایہ کاری سے مغربی، جنوبی اور وسطی ایشیاء کی تمام ریاستوں کے لیے خوشحالی کا باعث بنے۔ انڈرسیکرٹری جنرل ڈیپارٹمنٹ آف پیس آپریشنز نے اس کانفرنس کے میزبانی کے فرائض سرانجام دینے اور عالمی امن کیلئے بھرپور کردار ادا کرنے پر پاکستان کا شکریہ ادا کیا۔
جنرل سید عاصم منیر نے مسئلہ کشمیر کے حوالے سے اجلاس سے خطاب میں کہا کہ کشمیریوں کی امنگوں اور سلامتی کونسل کی قراردادوں کی روشنی میں مسئلہ کشمیر حل کیا جانا چاہیے۔ سیکرٹری جنرل اقوام متحدہ وسلامتی کونسل کو مسئلہ کشمیر کے کشمیر عوام کی امنگوں کے مطابق پرامن حل تلاش کرنے کے لیے اپنا کردار ادا کرنا چاہیے۔
اجلاس میں وزیرخارجہ جلیل عباس جیلانی نے خطاب کرتے ہوئے کہا کہ پاکستان پچھلی چھ دہائیوں سے عالمی امن وسلامتی کیلئے کوششوں اپنا بھرپور کردار ادا کر رہا ہے۔ وزیر خارجہ نے قیام امن کی خاطر اپنی جانیں دینے والے 171 پاکستانیوں سمیت تمام بہادر جوانوں اور خواتین کو خراج عقیدت پیش کیا اور دنیا بھر میں امن کیلئے خدمات سرانجام دینے والے امن دستوں کیلئے محفوظ ماحول بنانے کی ضرورت پر زور دیا۔
