میشا شفیع نے علی ظفر کی ساکھ کو نقصان پہنچانے کی خاطر جنسی ہراسانی کے جھوٹے الزامات عائد کیے: وکیل علی ظفر
ذرائع کے مطابق لاہور ڈسٹرکٹ کورٹ میں آج ملک کے معروف گلوکار واداکار علی ظفر کی طرف سے نامور گلوکارہ میشا شفیع کے خلاف ہتک عزت کیس کی سماعت ہوئی۔ علی ظفر کے وکیل نے میشا شفیع سے سوال پوچھا کہ کیا کوئی خاتون عوام کے سامنے جھوٹے الزامات لگا سکتی ہے؟ میشاشفیع نے وکیل کو جواب دیتے ہوئے کہا کہ ہر چیز ممکن ہے، خواتین پبلک میں جھوٹ بول سکتی ہیں اور کسی بھی شخص کے خلاف سنگین جھوٹے الزامات لگا سکتی ہیں۔
علی ظفر کے وکیل نے ہتک عزت کیس کا سامنے کرنے والی گلوکارہ میشا شفیع سے جرح کی جسے ان کے وکیل کی طرف سے غیرمتعلقہ قرار دیا گیا اور کہا کہ سوالات دہرائے جا رہے ہیں۔ علی ظفر کے وکیل کا سماعت کے دوران کہنا تھا کہ میشا شفیع نے علی ظفر کی ساکھ اور شہرت کو نقصان پہنچانے کی خاطر جنسی ہراسانی کے جھوٹے الزامات عائد کیے۔
میشا شفیع نے کیس کی سماعت کے دوران کہا کہ میں نے جھوٹ الزامات عائد نہیں کیے نہ ہی میں پاکستان میں "می ٹو" مہم لانچ کرنا چاہتی تھی نہ ہی اس کا مقصد شہرت حاصل کرنا تھا۔ یاد رہے کہ 2018ء میں میشا شفیع کی طرف سے علی ظفر کے خلاف سماجی رابطوں کی ویب سائٹ ٹوئٹر پر جنسی ہراسگی کے الزامات لگائے گئے تھے اور لکھا تھا کہ ایسے مسائل کے حوالے سے خاموشی اختیار نہیں کرنی چاہیے۔
میشا شفیع کے الزامات لگانے کے بعد علی ظفر کی طرف سے لاہور کی مقامی عدالت میں ہتک عزت کا دعویٰ دائر کیا گیا تھا جس کی سماعتیں اب تک جاری ہیں۔ خبر رساں ادارے ایکسپریس ٹریبون نے ٹوئٹر پر میشا شفیع کا خواتین کے پبلک میں جھوٹ بولنے کے بیان کو شیئر کیا جس پر ردعمل دیتے ہوئے علی ظفر نے لکھا کہ: مجھے اس کی بات پر یقین ہے!
