مسلم لیگ ن کی رہنما حنا پرویز بٹ نے پلےکارڈپر غلط اسپیلنگ لکھنےپر تنقید کرنےوالوں کو جواب دیدیا۔
تفصیلات کےمطابق مسلم لیگ ن کی رہنما اور رکن پنجاب اسمبلی حنا پرویز بٹ نے ایک احتجاجی مظاہرے کے دوران پلے کارڈ اٹھا رکھا تھا جس پر انگریزی لفظ condemn کے غلط اسپیلنگ درج تھے، ان کی پلے کارڈ تھامے تصویر سوشل میڈیا پر وائرل ہوئی جس کے بعد ٹویٹر پر comdemn کا ہیش ٹیگ ٹرینڈنگ میں آگیا۔
حناپرویز بٹ نے اس حوالے سے تنقید کرنے والوں کو جواب دیتے ہوئےٹویٹ کی اور کہا کہ اگر condemn کے سپیلنگ پوسٹر بنانے والے نے غلط لکھ دیے تو کونسی قیامت آ گئی؟؟
انہوں نے مزید کہا کہ آپ تو ایسے تنقید کر رہے جیسے زندگی میں آپ سے کوئی غلطی نہیں ہوئی۔۔ بھائی غلطی زندگی کا حصہ ہے، یہ کسی سے بھی ہو سکتی، چھوٹے لوگ دوسروں کا مذاق اڑاتے ہیں۔
صحافی احتشام الحق نے حنا پرویز بٹ کی ٹویٹ پر ردعمل دیتے ہوئے کہا کہ مسئلہ سپیلنگ کا نہیں بلکہ جہالت کا ہے۔
ایک اور صارف نے کہا کہ عمران خان کے منہ سے خاتم النبین کے لفظ ادا نہ ہونے پر کفر کےفتوے لگانے والوں کو اپنی غلطی پر ہلکی پھلکی تنقید بھی برداشت نہیں ہے،تاہم آپ کی غلطی سےلمز کے تعلیمی معیار پر بڑا سوالیہ نشان لگ گیا ہے۔
واضح رہے کہ حنا پرویز بٹ نے ٹویٹر پر اپنی ایک تصویر شیئر کی تھی جس میں خاتون جج سے متعلق عمران خان کےبیان کے خلاف ہونے والے ایک احتجاج میں شریک نظر آرہی تھیں، حنا پرویز بٹ نے ہاتھ میں ایک پلے کارڈ اٹھا رکھا تھا جس پر " ہم عمران خان کی جانب سےخاتون جج کو دھمکی دینے کی مذمت کرتے ہیں" درج تھا، تاہم انگلش میں لکھی اس عبارت میں ایک لفظ کے اسپیلنگ غلط تھے۔