وزیراعلیٰ پنجاب کے انتخاب کے معاملے پر ترین گروپ آپسی اعتراضات اور مطالبات کے باعث مشکلات کا شکار ہو گیا ہے کیونکہ کچھ ارکان کا جھکاؤ اپوزیشن اتحاد کی جانب ہے جبکہ کچھ ارکان چودھری پرویز الہٰی سے ملاقات کر کے انہیں تعاون اور حمایت کی یقین دہانی کرا چکے ہیں۔
ترین گروپ کی جانب سے حمزہ شہباز کی حمایت کے اعلان کے بعد تین ارکان نے گروپ سے علیحدگی اختیار کرتے ہوئے چودھری پرویز الہی کی حمایت کا اعلان کر دیا ہے۔
اسی تناظر میں پنجاب اسمبلی کے رکن رفاقت گیلانی نے یہ اعلان نجی ٹی وی چینل سے خصوصی گفتگو کرتے ہوئے کیا اور کہا کہ ہم سب عمران خان اور چوہدری پرویز الہیٰ کے ساتھ ہیں اسی لیے میں انہیں ایڈوانس میں مبارکباد بھی پیش کرنا چاہتا ہوں۔
انہوں نے مزید کہا کہ ہم جہانگیر ترین گروپ کا حصہ ہیں، ہمارے بہت سے ساتھیوں نے فیصلہ کیا کہ وہ ن لیگ میں شمولیت اختیار کریں گے، جب جہانگیر ترین پربراوقت تھا تو ہم نے ان کا ساتھ دیا ، ایک فیصلہ ضمیر کی آواز اور دل کا ہوتا ہے۔
رفاقت گیلانی نے کہا کہ اب وزیراعظم عمران خان پر ایک مشکل اور کٹھن وقت آیا ہواہے تو ہم ان کے ساتھ ہیں انشااللہ تعالی، میں سمجھتا ہوں کہ جہانگیر ترین گروپ کے تمام ارکان کو ہمارا ساتھ دینا چاہیے تھااور انہیں عمران خان کے فیصلے کو تسلیم کرتے ہوئے چوہدری پرویز الہیٰ کی حمایت کااعلان کرنا چاہیے تھا۔
انہوں نے مزید کہا کہ کل وزیراعلی کے انتخاب کا دن ہے جس میں ہماری فتح ہوگی اور ہم انشااللہ اس انتخاب کے بعد فتح کا جشن منائیں گے۔
پنجاب اسمبلی میں چھینہ گروپ پہلے ہی پرویز الہیٰ کی حمایت کا اعلان کرچکا ہے اس کے علاوہ مسلم لیگ (ن) کے منحرف ارکان بھی ق لیگ کے امیدوار کی حمایت کا اعلان کرچکے ہیں۔ کہا جا رہا ہے کہ پنجاب کے نئے وزیراعلیٰ کے انتخاب کے روز ن لیگ کے چار ارکان غیر حاضر ہوسکتے ہیں۔
میڈیا رپورٹس میں کہا جا رہا ہے کہ اگر اس طرح ارکان غیر حاضر ہوئے تو اس کا براہ راست فائدہ پرویز الہیٰ کو ہوگا۔ ن لیگ کی جانب سے تاخیر سے وزارت اعلیٰ کے امیدوار کا اعلان کیا گیا جس کے باعث حمزہ شہباز ارکان اسمبلی سے موثر رابطہ نہ کر پائے۔
مسلم لیگ ن کے مطابق ارکان صوبائی اسمبلی سے رابطوں کا ٹاسک رانا ثنااللہ کو دیا گیا ہے جو کہ ارکان سے رابطے کی کوششوں میں مصروف عمل ہیں اور زیادہ سے زیادہ ارکان کو اپنی حمایت میں لانے کیلئے سرتوڑ حربے آزما رہے ہیں۔
Last edited by a moderator:
