قومی اسمبلی کے قائد حزب اختلاف راجا ریاض کا کہنا ہے کہ عمران خان کے بیان پر سپریم کورٹ اور حکومت پاکستان کارروائی کرے۔
چیئرمین تحریک انصاف کے متنازع بیان پر ردعمل دیتے ہوئے اپوزیشن لیڈر راجا ریاض کا کہنا تھا کہ عمران نیازی کے اداروں سے متعلق بیان کی مذمت کرتا ہوں، حکومت پاکستان اور سپریم کورٹ کو چاہئے کہ عمران خان کے بیان پر فوری ایکشن لے۔
راجا ریاض کا کہنا تھا کہ عمران خان اقتدار کے لالچ میں اندھے ہو چکے ہیں اور پاکستان کے ایٹمی پروگرام اور ملکی سالمیت کے خلاف اوچھے ہتھکنڈوں پر اتر آئے ہیں، پاکستان کے تین ٹکڑوں کی خواہش ان کی ذہنی اختراع ہے۔
راجا ریاض نے کہا کہ ایٹمی پروگرام ملکی سلامتی کے اداروں کے ہاتھوں میں محفوظ تھا، ہے اور رہے گا، ہمیں ملکی سلامتی کے اداروں پر اعتماد ہے، پاک فوج ہی ملک کی سلامتی کی ضامن ہے۔
اپوزیشن لیڈر کا مزید کہنا تھا کہ پاکستان کو بنانا ری پبلک بنانے کی عمران خان کی مذموم کوشش کو کبھی کامیاب نہیں ہونے دیں گے، چیئرمین پی ٹی آئی قومی سلامتی کے درپے ہیں، آزاری اظہار سب کا حق مگر بیرونی سازش کے ایجنڈے پر کام کرنے والے شخص پر فی الفور پابندی ہونی چاہیے۔
دوسری جانب امریکہ میں تعینات سابق پاکستانی سفیر حسین حقانی نے بھی عمران خان کے بیان کی مذمت کی ہے اور کہا ہے کہ ایٹمی ہتھیار کسی کھلاڑی کا بلا یا گیند نہیں کہ کوئی انہیں چُرا یا ہتھیا لے گا۔ عجیب بات ہے کہ جن ہتھیاروں کے حصول کو ملک کی سلامتی کا ضامن قرار دیا گیا تھا ۔
انہوں نے مزید کہا کہ اب ایک فرد کے اقتدار کی بحالی کے لئے ان کے چھینے جانے کا خوف پیدا کیا جا رہا ہے۔ پاکستان کو ڈر کے گرداب سے نکل جانا چاہئے۔