ڈیڑھ دہائی سے زیادہ عرصے تک جرمنی پر حکمرانی کرنے والی جرمن چانسلر انجیلا مرکل کی جماعت عام انتخابات میں شکست سے دوچار ہو گئی۔ غیر ملکی میڈیا کے مطابق انجیلا مرکل کی جماعت کرسچن ڈیموکریٹک یونین 196 نشستیں لے سکی ہے۔
تفصیلات کے مطابق 16 سال تک جرمنی پر حکومت کرنے والی چانسلر انجیلا مرکل کی جماعت کرسچن ڈیموکریٹک یونین نے عام انتخابات میں مطلوبہ نتائج حاصل نہیں کیے اور 24 اعشاریہ ایک فیصد کامیابی کے تناسب کے ساتھ ایک سو چھیانوے سیٹیں لے سکی ہے۔
جب کہ کانٹے دار مقابلے کے بعد جرمنی کے عام انتخابات 2021 میں کامیاب ہونے والی حریف جماعت سوشل ڈیموکریٹس نے 25 اعشاریہ 7 فیصد کامیابی کے تناسب کے ساتھ 205 نشستیں حاصل کی ہیں۔
اس کے مقابلے میں ایک اور جماعت گرین نے 14 اعشاریہ8 فیصد ووٹ حاصل کیے اور بڑی دونوں جماعتوں کے بعد تیسرے نمبر پر رہی ہے اور حیران کن طور پر 118 سیٹیں لینے میں کامیاب ہوئی ۔
ایف ڈی پی اور اے ایف ڈی نے بالترتیب 92 اور 83 سیٹیں حاصل کیں جبکہ ڈائی لنک 39 سیٹیں جیتنے میں کامیاب رہی۔
خیال کیا جا رہا ہے کہ اب سوشل ڈیموکریٹس کو حکومت بنانے کیلئے اتحاد کی ضرورت پڑے گی۔
جرمن معاملات پر گہری نظر رکھنے والے تجزیہ کاروں کا خیال ہے کہ جب تک نئی حکومت تشکیل نہیں پاتی تب تک انجیلا مرکل بطور چانسلر اپنے فرائض انجام دیتی رہیں گی مگر اس میں بھی ابھی کافی وقت درکار ہے۔
خیال رہے کہ الیکشن 2017 میں انجیلا مرکل کی جماعت نے 246 سیٹیں حاصل کی تھیں اور کولیشن حکومت تشکیل دی تھی۔ انجیلا مرکل 2005 سے جرمن چانسلر ہیں
- Featured Thumbs
- https://i.imgur.com/hqh0IdL.jpg
