بھارتی فوج نے حالیہ جھڑپوں میں پاک فضائیہ کے ہاتھوں اپنے لڑاکا طیارے تباہ ہونے کی پہلی بار تصدیق کر دی ہے۔
امریکی جریدے بلوم برگ کو دیے گئے انٹرویو میں بھارتی چیف آف ڈیفنس اسٹاف جنرل انیل چوہان نے اعتراف کیا کہ پاکستان کے ساتھ حالیہ جھڑپوں میں بھارت نے لڑاکا طیارے کھوئے ہیں۔
جب ان سے پاکستان کی جانب سے چھ بھارتی طیارے گرائے جانے کے دعوے کے بارے میں سوال کیا گیا تو جنرل انیل چوہان نے طیاروں کی درست تعداد بتانے سے گریز کرتے ہوئے کہا کہ "یہ اہم نہیں، ہمارے لیے اصل سوال یہ ہے کہ طیارے گرے کیوں۔"
انہوں نے تسلیم کیا کہ جھڑپوں کے دوران بھارت کی جانب سے تکنیکی غلطیاں ہوئیں جنہیں بعد میں درست کیا گیا۔ ان کے مطابق، ان اصلاحات کے بعد بھارتی طیاروں نے طویل فاصلے تک اہداف کو کامیابی سے نشانہ بنایا۔
یاد رہے کہ بھارت نے مقبوضہ کشمیر کے علاقے پہلگام میں ہونے والے حملے کو بنیاد بناتے ہوئے پاکستان کے خلاف آبی جارحیت کا آغاز کیا اور یکطرفہ طور پر سندھ طاس معاہدہ معطل کر دیا۔ اس کے بعد 6 اور 7 مئی کی درمیانی شب بھارت نے پاکستان اور آزاد کشمیر کے مختلف علاقوں پر میزائل حملے کیے، جن کا پاکستانی فوج نے بھرپور اور فوری جواب دیا۔
بعد ازاں، 10 مئی کو بھارت نے ایک بار پھر نور خان ایئربیس اور رحیم یار خان ایئرپورٹ پر میزائل حملے کیے۔ پاکستان نے اس کے ردعمل میں آپریشن بنیان مرصوص شروع کیا، جس کے دوران پاکستان نے بھارت کے 3 رافیل سمیت 6 لڑاکا طیارے گرائے، اور آدم پور، ادھم پور سمیت متعدد ایئرفیلڈز اور ایمونیشن ڈپوز کو بھی نشانہ بنا کر تباہ کر دیا۔
پاکستان کی موثر جوابی کارروائی کے بعد بھارت کو اپنی پوزیشن کمزور نظر آنے لگی، جس پر اس نے امریکا اور دیگر اتحادی ممالک سے جنگ بندی کے لیے مداخلت کی درخواست کی۔ نتیجتاً دونوں ممالک کے درمیان سیز فائر عمل میں آیا۔
Last edited:
