
وزیراعظم عمران خان کی ہمشیرہ علیمہ خان نے بلاول بھٹو کی جانب سے اپنے اور والد پر لگائے گئے الزامات کے جواب میں کہا کہ میرے والد نے جب نوکری چھوڑ کر انجنیئرنگ کمپنی بنائی تب ذوالفقار بھٹو وکالت کیا کرتے تھے۔ میں 1994 سے ٹیکسٹائل بزنس سے وابستہ ہوں مگر سلائی مشینوں پر کام کرنے والوں کا مذاق بنایا جاتا ہے جو کہ دکھ کی بات ہے۔
نجی ٹی وی چینل سے گفتگو کے دوران علیمہ خان نے بلاول کے الزامات کے جواب میں کہا کہ میرے والد پر بہتان لگانے سے پہلے حقائق معلوم کر لیں۔ میرے والد ایک ایماندار اور معزز شخص تھے۔ بلاول بیٹا تمہیں پاکستان کے بارے میں معلومات لینے کی ضرورت ہے، 1994 سے میرا ٹیکسٹائل کا بزنس ہے۔
انہوں نے کہا کہ ٹیکسٹائل کی معیاری مصنوعات لاکھوں محنت کش سلائی مشین پر ہی بناتے ہیں۔ علیمہ خان نے مزید کہا پاکستان کی سب سے بڑی ٹیکسٹائل کی مصنوعات ان ہی مشینوں کی بدولت ہے۔ دکھ کی بات یہ ہے کہ سلائی مشینوں پر کام کرنے والوں کا میڈیا پر مذاق بنایا جاتا ہے۔
علیمہ خان کا یہ بھی کہنا ہے کہ سلائی مشین پر کام کرنے والے معیشت میں ریڑھ کی ہڈی کی حیثیت رکھتے ہیں۔ اس سے قبل حفیظ اللہ خان نیازی بھی بلاول بھٹو کی جانب سے عمران خان کے والد پر لگائے گئے الزامات کو مسترد کر چکے ہیں انہوں نے کہا تھا کہ بلاول کے الزامات سفید جھوٹ ہیں۔
یاد رہے کہ چیئرمین پیپلزپارٹی بلاول بھٹو نے گزشتہ روز پریس کانفرنس میں کہا تھا کہ علیمہ خان نے سلائی مشین کے نام پر اربوں کی کرپشن کی، علیمہ باجی نے سلائی مشین سے اتنا پیسہ بنایا ہے۔ ان کا یہ بھی کہنا تھا کہ میرا خاتونِ اوّل کے لیے بہت احترام ہے، کبھی غلط زبان استعمال نہیں کی، البتہ پنجاب میں کوئی تقرری یا تبادلہ خاتونِ اوّل کو پیسے دیے بغیر نہیں ہوتا۔
- Featured Thumbs
- https://www.siasat.pk/data/files/s3/aleema-kahn-and-bilawal.jpg