سابق وزیراعلی پنجاب اور صدر پی ٹی آئی چوہدری پرویز الہیٰ کےبیٹے مونس الہیٰ کے خلاف منی لانڈرنگ اور رشوت ستانی کا مقدمہ درج کرلیا گیا ہے۔
تفصیلات کے مطابق وفاقی تحقیقاتی ایجنسی(ایف آئی اے) نے سابق وفاقی وزیر مونس الہیٰ کے خلاف منی لانڈرنگ اور رشوت ستانی کی دفعات کے تحت مقدمہ درج کیاہے۔
مقدمے میں مونس الہیٰ کےعلاوہ سات دیگر افراد کو بھی نامزد کیا گیا ہے جن میں عامر سہیل، عمار فیاض، وجاہت احمد خان، احمد فاران خان، ضیغم عباس، زہرا الہیٰ شامل ہیں۔
مقدمے کے متن میں کہا گیا ہے کہ مونس الہیٰ کو تین بار اس معاملے میں پیش ہونے کیلئے نوٹسز جاری کیے گئے مگر وہ پیش نہیں ہوئے۔ مونس الہیٰ کو آخری بار یکم جون کو طلب کیا گیا۔
مقدمہ کے مطابق مونس الہیٰ نے مختلف محکمہ جات میں اپنا اثر رسوخ کا استعمال کرتے ہوئے کرپشن کی، رشوت اور کرپشن سے حاصل ہوئی رقم کی منی لانڈرنگ کی اور رقوم اپنے فیملی ممبرز اور دیگر لوگوں کے اکاؤنٹس میں جمع کروائی اس سارے کاموں میں مونس الہیٰ کے فرنٹ مین عامر سہیل نے اہم کردار ادا کیا۔
