واشنگٹن: امریکی محکمہ خارجہ کی ترجمان ٹیمی بروس نے اس تاثر کی تردید کی ہے کہ امریکی حکومت نے امریکا میں داخلے پر پابندی عائد کرنے کے لیے کسی ملکوں کی فہرست تیار کی ہے۔
بریفنگ کے دوران ٹیمی بروس نے کہا کہ کئی دنوں سے جس فہرست کا ذکر کیا جا رہا ہے، وہ حقیقت میں موجود نہیں ہے۔ انہوں نے مزید وضاحت دیتے ہوئے کہا کہ صدر ڈونلڈ ٹرمپ کے حکم پر امریکی سلامتی کے حوالے سے جائزہ لیا جا رہا ہے کہ ویزا کے مسائل کو کس طرح حل کیا جائے اور کسے امریکا میں داخلے کی اجازت دی جائے۔
ٹیمی بروس نے کہا کہ اس جائزے کے مکمل ہونے کے بعد اس حوالے سے تفصیل سے بات کی جائے گی۔
ترجمان نے یہ بھی عزم ظاہر کیا کہ امریکی محکمہ خارجہ افغان باشندوں کے لیے اپنے منصوبے پر کاربند رہے گا، جنہوں نے امریکی فوج کے لیے اپنی جانیں خطرے میں ڈالی ہیں۔ ان افراد کو امریکا میں بسانے کا منصوبہ جاری رکھا جائے گا۔
اس سے قبل غیر ملکی میڈیا نے رپورٹ دی تھی کہ ٹرمپ انتظامیہ اپنے سابقہ دور کی طرح سفری پابندیاں عائد کرنے پر غور کر رہی ہے، جس کے اثرات افغانستان اور پاکستان سمیت متعدد ممالک پر مرتب ہو سکتے ہیں۔
