امریکا میں مسافر طیارہ فوجی ہیلی کاپٹر سے ٹکرا کر دریا میں گر گیا، 18 افراد
کی لاشیں برآمد
امریکا میں ایک مسافر طیارہ فوجی ہیلی کاپٹر سے تصادم کے بعد دریائے پوٹومیک میں گر کر تباہ ہو گیا، جس کے نتیجے میں اب تک 18 لاشیں نکالی جا چکی ہیں۔
غیر ملکی خبر رساں اداروں کے مطابق یہ حادثہ ریگن نیشنل ایئرپورٹ کے قریب اس وقت پیش آیا جب ایک آرمی بلیک ہاک ہیلی کاپٹر سے ٹکرانے کے بعد طیارہ دریا میں جا گرا۔ حادثے کا شکار ہونے والا امریکن ایئرلائنز کا جیٹ طیارہ تھا، جس میں 64 افراد سوار تھے۔
وفاقی حکام کے مطابق حادثہ بدھ کی شام پیش آیا، جس کے بعد واشنگٹن ڈی سی کے رونالڈ ریگن نیشنل ایئرپورٹ پر تمام اندرونی اور بیرونی پروازیں معطل کر دی گئیں۔
ادھر، کینساس سے تعلق رکھنے والے سینیٹر جیری موران نے سماجی رابطے کی ویب سائٹ ایکس پر اپنے بیان میں کہا کہ وہ حکام سے رابطے میں ہیں اور طیارے میں سوار تمام افراد کے لیے دعاگو ہیں۔
فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) نے حادثے کی وجوہات جاننے کے لیے تحقیقات کا آغاز کر دیا ہے۔ تاہم، فوری طور پر عملے اور دیگر مسافروں کی حالت کے بارے میں مزید تفصیلات فراہم نہیں کی جا سکیں۔
