الیکشن کمیشن ذرائع نے چیف الیکشن کمشنر سے ارکین اسمبلی کی ملاقات کے حوالے سے پی ٹی آئی کی جانب سے عائد الزامات پر ردعمل دیدیا ہے۔
تفصیلات کے مطابق الیکشن کمیشن کے ذرائع نے چیف الیکشن کمشنر سے سیاسی جماعتوں کے رہنماؤں کی ملاقات کے حوالے سے ردعمل دیتے ہوئے کہا ہے کہ تمام پارلیمنٹرینز چیف الیکشن کمشنر سے ملاقات کرچکے ہیں،تاہم دوسری پارٹیوں کے مقابلے میں سب سے زیادہ پی ٹی آئی کے وزراء اور رہنماؤں نے ملاقاتیں کی ہیں۔
ذرائع الیکشن کمیشن کے مطابق چند ہفتے قبل بھی رہنما تحریک انصاف شاہ محمود قریشی نے چیف الیکشن کمشنر سے ڈیڑھ گھنٹے تک ملاقات کی، ہمایوں اختر نے بھی چیف الیکشن کمشنر سے حال ہی میں ملاقات کی ہے۔
الیکشن کمیشن ذرائع کے مطابق چیف الیکشن کمشنر کے عہدے کا تقاضا ہے جو سیاستدان ان سے ملنا چاہیں وہ ان سے اپنے دفتر میں ملیں،پی ڈی ایم رہنماؤں نے صرف چیف الیکشن کمشنر سے نہیں بلکہ پورے چیف الیکشن کمیشن سے ملاقات کی ہے جو ایک معمول کی بات ہے۔
پاکستان تحریک انصاف کے رہنما فواد چوہدری نے اس بیان پر ردعمل دیتے ہوئے کہا کہ کان کھول کر سنتے تو ایسا بے شرموں والا بیان جاری نہ کرتے کوئی بھی نمائندہ زیر سماعت مقدمے پر گفتگو کیلئے نہیں ملا جوڈیشل معاملے پر مذاکرات نہیں ہوتے، انتظامی معاملہ ہو علیحدہ بات ہے۔
