اداکار شان شاہد کا وزیراعظم سے بھارتی فلموں پر پابندی کا مطالبہ ۔۔ سوشل میڈیا صارف کو جواب
پاکستان فلم انڈسٹری کے معروف اداکار شان شاہد نے وزیراعظم عمران خان سے پاکستان میں بھارتی فلموں پر پابندی لگانے کا مطالبہ کردیا ہے، ٹوئٹر پر شان شاہد نے وزیراعظم عمران خان کو مخاطب کیا اور کہا کہ ’براہ کرم! پاکستان کی ثقافتی سرحدوں کی حفاظت کریں،پاکستان میں بھارتی کوئی فلم ریلیز نہ کی جائے۔
اداکار نے مزید کہا کہ جس طرح بھارت نے پاکستانی گلوکاروں،فنکاروں اور پاکستانی مواد پر پابندی عائد کر دی ہے، آپ بھی اسی طرح کریں،احترام اور مساوات کسی بھی تجارت میں ایک اہم حصہ ہونا چاہیے۔
شان شاہد کے اس ٹویٹ پر ایک صارف نے کہا کہ مقابلے سے مت ڈریں بلکہ پہلے اپنے مواد کو بہتر بنائیں، پاکستان کے علاوہ پوری مسلم دنیا بھارتی فلمیں دکھا رہی ہے،70، 80 اور 90 کی دہائی میں سرکاری ٹی وی چینل نے مثال قائم کی تھی کہ کس طرح انہوں نے اس وقت صرف اپنے اعلیٰ مواد کی وجہ سے بھارت کے دور درشن کو شکست دی تھی۔
صارف کے اس تنقیدی ردعمل پر شان شاہد نے جوابی ردعمل دیتے ہوئے کہا کہ ہم ان کے مقابلے سے نہیں ڈرتے بلکہ انہوں نے خوف میں ہمارے فنکاروں اور مواد پر پابندی لگا دی ہے۔
ان کا کہنا تھا کہ میرا نقطہ صرف احترام اور حب الوطنی ہے۔
- Featured Thumbs
- https://www.siasat.pk/data/files/s3/shanh11231.jpg
