پنجاب میں بد نظمی کے واقعات سامنے آنے پر وزیر اعظم ناراض ہو گئے، مفت آٹا اسکیم کو سستا آٹا اسکیم میں بدلنے پر غور شروع ہو گیا۔
تفصیلات کے مطابق وزیر اعظم شہباز شریف نے آٹے کی تقسیم میں بدنظمی پر اظہار ناراضی کیا ہے، ذرائع کا کہنا ہے کہ اس سلسلے میں محکمہ خوراک پنجاب کے سیکریٹری اور افسران کے خلاف کارروائی کا فیصلہ کیا گیا ہے۔ سستا آٹا اسکیم سے زیادہ لوگ فائدہ اٹھا رہے تھے، اس لیے مفت آٹا اسکیم کو سستا آٹا اسکیم میں بدلنے پر غور کیا جا رہا ہے۔
ذرائع نے بتایا کہ سیکریٹری خوراک سمیت تمام ذمہ داران کو تبدیل کرنے کا فیصلہ کر لیا گیا ہے۔
یاد رہے کہ پنجاب حکومت کی جانب سے رمضان پیکج کے تحت شہریوں میں مفت آٹے کی فراہمی کا سلسلہ جاری ہے۔ تاہم یہاں بڑی تعداد میں آنے والے لوگوں میں دھکم پیل کے واقعات کئی شہریوں کی جان لے گئے ہیں۔
