quraan main insaanu ko jaga jaga ye hukam diya gayaa hai khudaa ki taraf se keh adal se kaam lo aik doosre ke maamle main.
yahee nahin jaga jaga mana kiya gayaa hai aik doosre per zulmo ziyaadati se.
quraan ke mutaabiq sab kaainaat sirf aur sirf Allah hi ki malkiyat hai aur sirf aur sirf wohee akela is ka haakim aur baadshah hai.
hamaare saamne aik haqeeqat ye bhi hai keh sab insaan is duniya main baraabar nahin hen balkeh un main kayee tarah ke farq hen. ye farq kab se hen ya kahaan se aaye hen ya kaise aaye hen aur kyun hen? aam log to yahee kahen ge ye sab farq khudaa ne peda kiye hen. aisa nahin hai. magar is jawaab ko samajhne ke liye logoon ko qadre aqal istemaal karne ki zaroorat hai.
khudaa ki is duniya main her kaam sirf aur sirf khudaa hi nahin karta balkeh us ne jo kuchh bhi peda kiya hai woh sab woh woh kaam karte hen jis ke liye khudaa ne un ko peda kiya hai. yani her shai apna apna kirdaar adaa karti hai. lihaaza duniya main jo kuchh bi ham ko nazar aa rahaa hai ye aik mushtarikka karkardagi hai khudaa aur us ki mukhlooq ki.
issi mushtarika karkardagi ka nateeja hai keh sab log aik doosre se mukhtalif hen. jis kisi ke baap ne jaisi maan apne bachoon ke liye pasand ki ya haasil ki waise hi us ke bache peda huwe.
khudaa kisi per bhi kisi bhi tarah ka zulmo ziyadati nahin karta aur ye baat khudaa quraan main baar baar bataata hai. agar khudaa ne insaanu per khud zulmo sitam kiya hota to phir woh kaise logoon ko keh sakta tha keh tum aik doosre ke saath zulmo ziyaadati mat karo?
insaanu ko khudaa ne dimaagh diya hai hawaas diye hen taa keh woh sab kuchh soch samajh ker karen ta keh us ka anjaam un ke liye achhaa ho. magar log aisa karte nahin hen balkeh aksar log pehle kuchh ker guzarte hen phir jab bayaanak nateeja saamne aata hai to chonk jaate hen ye ham se kia ho gayaa. ab maafiyan maangte phirte hen magar ab to paani sar se guzar chuka. aainda khayaal rakhna chahiye magar aksar auqaat log phir wohi kuchh ker guzarte hen.
ab sawaal peda hota hai agar khudaa insaanu se adal ka taqaaza karta hai aik doosre ke baare main to kia ye adal hai keh kuchh log to khudaa ki kaainaat ke maalik ban baithen aur baaqi dhoop main jaa baithen aur jalte rahen?
ab aik aur sawaal log aapas main ladte kyun hen? kia khudaa ne logoon ko aapas main ladne ka hukam diya hai? aisa to nahin hai. balkeh khudaa ne to insaanu ko jab se apne paighamaat bhaijne shuroo kiye hen un ko aqalo fiker hi se kaam lene ke liye bola hai aur kahaa hai aaps main miljul ker aik khaandaan ki tarah jio aik doosre ka poora poora khayaal rakhte huwe.
ye is liye keh log khudaa ka paighaam milne se pehle hi se aapas main lad jhagad rahe the aur khoon kharaabe se tang aa chuke the aapsi dushmaniyun ki wajah se. quraan ke nazool se pehle bhi yahee kuchh ho rahaa tha duniya main logoon ke beech. issi khonraizi se rokne ke liye hi khudaa ne quraan ko naazal farmayaa.
quraan main yahee bataaya gayaa hai keh apni apni zarooraten theek tareeqe se poora karo taa keh tum log aapas main jango jadal se bache raho.
issi liye islam deen hai mazhab nahin hai kyunkeh mazhab insaanu ki zarooratun ko theek tarah se poora karne ka koi drust aur kaaraamand program hi nahin deta. bas pooja paat main lage raho baaqi jaaye bhaad main.
insaanu ne apne dimaagho hawaas istemaal ker ke apne liye aik duniya banayee jisse khud insaan aakhirkaar tang pad ge. unhi main se baaz jo behtar soch sakte the khudaa ki hidayat ke talabgaar huwe.
ussi taareek dor main khudaa ne insanu ki rahnumayee farmayee apne noore hidaayat ki shuroowaat se jo quraan ki soorat main takmeel ko pohnchi.
issi dor se insaanu ke darmayaan jo pehle hi se aapas main jhagad rahe the aik aur baat jhagde ki bunyaad ban gayee. yani baaz log jaise ji rahe the waise hi jeena chahte the magar baaz naye tareeqe se zindagi guzaarna chahte the. tab se aaj tak do mukhtalif zindagi guzaarne ke raastun per mabni jang shuroo hai insaanu main.
sawaal peda hota hai ye do zindagi guzaarne ke raaste kia the aur in ki bunyaaden kia thin?
ye do raaste kufar aur deene islam kehlaate hen.
kufar ke raaste ki bunyaad kia hai aur is ka intahee maqsad kia hai?
kufar ke raaste ki bunyaad zaati mufaad parasti hai, yani doosrun ko nuqsaan pohnchaa ker apni zaat ko faaida pohnchaane ke liye jeena aur issi ke liye jidojohd karna. is ka intahee maqsad kuchh bhi nahin hai, yani kufaar ki zindagi jaanwarun ki tarah balkeh un se bhi gayee guzari zindagi is duniya main jeena aur mer jaana hai.
deene islam yani amno salaamti ke raaste ki bunyaad kia hai aur is ka intayee maqsad kia hai?
deene islam ki bunyaad doosrun ki behtari ke liye jeena aur issi ke liye jidojohd ya mehnato mushaqqat ya koshish karna hai. deene islam khudaa ki taraf se diya gayaa insaanu ke liye zindagi guzaarne ka drust raasta hai. is liye keh ye khudaa ke maqsade takhleeqe kaainaat ko poora karen ka mukammal program hai insaanu ke liye.
ye program ye hai keh sab insaan aik ummat ban ker khudaa ke diye ge dastooro qanoon ke mutaabiq khudaa ki mumlikat main amno salaamati se rahen. yahee wajah hai deene islam aik mission ya tehreek hai pooja paat ki nahin khudayee maqsade kaainaat ko poora karne ki.
ab zahir hai log ummat bane baghair to khudaa ke dastooro qanoon ke mutaabiq us ki mumlikat main ji nahin sakte to phir un ko kia karna ho ga? zahir hai ummat banane ke liye un ko tehreek chalaani ho gi.
agar tehreek hi chalaani hai to phir tehreek chale gi kaise? is ki ibtadaa issi tehreek ke manifesto ya manshoor se ho gi. is tehreek ka manshoor kia hai? quraan. yahee wajah hai logoon ko quraan ka program samajhna ho ga aur us ka maqsad samajhna ho ga tabhi woh is ke liye tehreek chalaa saken ge warna woh tehreek kaise chale gi jis ka sar na paer?
yahee wajah hai her paighambare khudaa ne apna mission khudaa ki wahee ki bunyaad per shuroo kiya aur us ki takmeel ki. sab se pehle her paighambar ne apne logoon main jin ki taraf woh bhaija gayaa tha khudaa ka paighaam aam kiya. phir jab logoon ne us ko tasleem ker liya to ummat tashkeel di aur yun is duniya main khudaa ke paighambarun ne khudayee mumlikaten qaaim keen. bilkul yahee kaam khudaa ke aakhari paighambar ne kiya. yahee kaam aaj musalmaanu ko bhi karna ho ga agar woh ummat banana chahte hen aur is duniya main khudaa ke dastooro qanoon ke mutaabiq jeena chahte hen.
is tanaazur main dekhen sadqa, khairaat , amaale saalia, amaale hasna, zakaat waghera kaise fit hote hen. yahee nahin issi tanaazur main dekhen deene islam ke paanch satoon kaise fit hote hen, yani toheed, salaat, sowm, zakaat aur hajj ya jihaad waghera.
yaheen se saaf saaf zahir hai deene islam ka mullaan ki kharafaat se kuchh lena dena nahin hai.