پاک افغان میچ کے دوران پاکستانی کھلاڑی آصف علی کو آؤٹ کرکے نامناسب انداز میں جشن منانے والے افغان باؤلر پر سوشل میڈیا صارفین کی شدید تنقید۔
تفصیلات کے مطابق ایشیاء کپ کے سپر فور مرحلے میں پاک افغان میچ کے دوران افغان باؤلر فرید احمد ملک نےپاکستانی بیٹسمین آصف علی کو آؤٹ کرکے نامناسب انداز میں جشن منایا جس پر آصف علی کو بھی شدید غصہ آیا اور دونوں کھلاڑی آمنے سامنے آگئے، تاہم کھلاڑیوں نےبیچ بچاؤ کروایا۔
میچ کے بعد سوشل میڈیا صارفین نے فرید احمد ملک کی اس حرکت پر شدید ردعمل کا مظاہرہ کرتے ہوئے انہیں کھری کھری سنادیں۔
صحافی وجاہت کاظمی نے اپنی ٹویٹ میں کہا کہ کچھ افغان کھلاڑیوں کی جانب سے شرمناک رویہ سامنے آیا، میں اس باؤلر کا نام بھی نہیں جانتا جس نے آصف علی کو آؤٹ کیا مگر اس کھلاڑی کا ایٹی ٹیوڈ دیکھیں، لوزر۔
صحافی سمیرا خان نے کہا کہ افغان پلیئرز نے آصف علی سے بدتمیزی کی ہے، ایمپائر کو مداخلت کرنا پڑی، یہ افغان کھلاڑیوں کی جانب سے نیچ سپورٹس مین سپرٹ کا مظاہرہ کیا گیا ہے۔
ہارون نامی صارف نے آصف علی اور فرید احمد ملک کے درمیان لڑائی کی ویڈیو شیئر کی۔
سیٹھ عبداللہ نامی صارف نے کہا کہ نسیم شاہ نے آصف علی کا بدلہ لے لیا، وہ وننگ شاٹ مارنے کے بعد شدید غصے میں تھے۔
واضح رہے کہ آج ہونے والے سنسنی خیز میچ میں پاکستان نے افغانستان کو ایک وکٹ سے ہرا کر فائنل کیلئےکوالیفائی کرلیا ہے، افغانستان کو شکست دینے کے بعد بھارت اور افغانستان ایونٹ سے باہر ہوگئی ہیں۔