واشنگٹن: امریکی صدر ڈونلڈ ٹرمپ نے انکشاف کیا ہے کہ انہوں نے روسی صدر ولادیمیر پیوٹن سے فون پر بات چیت کی، جس میں یوکرین میں جاری جنگ کے خاتمے پر تبادلہ خیال کیا گیا۔
برطانوی خبر رساں ادارے رائٹرز کے مطابق، نیویارک پوسٹ کو ایئر فورس ون پر دیے گئے انٹرویو میں ٹرمپ سے پوچھا گیا کہ انہوں نے پیوٹن سے کتنی بار بات کی ہے، تو انہوں نے جواب دیا کہ "بہتر ہے کہ اسے نہ بتایا جائے۔" تاہم، انہوں نے کہا کہ پیوٹن چاہتے ہیں کہ لوگوں کی اموات روکی جائیں اور انہیں مرنے سے بچایا جائے۔
انٹرویو میں ٹرمپ نے بتایا کہ ان کے پیوٹن کے ساتھ "ہمیشہ اچھے تعلقات رہے ہیں" اور پیوٹن کے پاس جنگ کے خاتمے کے لیے ایک "ٹھوس منصوبہ" ہے، لیکن انہوں نے اس کی تفصیلات نہیں بتائیں۔
امریکی صدر نے کہا کہ وہ امید کرتے ہیں کہ جنگ کے خاتمے کا عمل تیز ہو جائے گا کیونکہ "ہر روز لوگ مر رہے ہیں، یوکرین میں یہ جنگ بہت خراب ہے، اور میں اس خوفناک چیز کو ختم کرنا چاہتا ہوں۔"
کریملن اور وائٹ ہاؤس نے اس حوالے سے فوری طور پر کوئی تبصرہ نہیں کیا۔ جنوری کے اواخر میں کریملن کے ترجمان دمتری پیسکوف نے کہا تھا کہ پیوٹن ٹرمپ کے ساتھ فون پر بات چیت کے لیے تیار ہیں اور ماسکو واشنگٹن کی جانب سے آمادگی کا انتظار کر رہا ہے۔
گزشتہ روز ٹرمپ نے کہا تھا کہ وہ ممکنہ طور پر اگلے ہفتے یوکرین کے صدر ولادیمیر زیلینسکی سے ملاقات کریں گے اور جنگ کے خاتمے پر بات چیت کریں گے۔
یوکرین پر روس کے مکمل حملے کے ساتھ شروع ہونے والی جنگ کے 24 فروری کو تین سال مکمل ہو جائیں گے۔ اس تنازع کے دوران ہزاروں افراد ہلاک ہو چکے ہیں، جن میں اکثریت یوکرین کے شہریوں کی ہے۔
- Featured Thumbs
- https://i.imghippo.com/files/afj5209evI.jpg
