تحریک عدم اعتماد کی کامیابی کے بعد ایک طرف تحریک انصاف کی حکومت ختم ہوئی تو دوسری طرف پُرامن احتجاج کا سلسلہ شروع ہو گیا، اس احتجاج میں تحریک انصاف کے کارکنان کی ایک بڑی تعداد شریک ہوئی مگر ملکی مین اسٹیم میڈیا پر اس کا مکمل بلیک آؤٹ کیا گیا، مگر عالمی میڈیا پر اس کی بھرپور کوریج ہوئی۔
تفصیلات کے مطابق اتوار کی شام 8 بجے سے 10 بجے کے دوران تحریک انصاف کی جانب سے پرامن احتجاج کیا گیا اس احتجاج میں لاہور، کراچی، ملتان، فیصل آباد سمیت دیگر شہروں سے بڑی تعداد میں کارکنان شریک ہوئے۔
حیران کن طور پر اس مظاہرے کو پاکستان کے کسی بڑے میڈیا ہاؤس کی جانب سے کور نہیں کیا گیا جبکہ غیر ملکی بالخصوص ترک میڈیا میں اس کو بھرپور کوریج دی گئی اور دکھایا گیا کہ کتنی بڑی تعداد میں تحریک انصاف کے کارکنان باہر نکلے اور امپورٹڈ حکومت نامنظور سمیت دیگر نعرے بلند کرتے رہے ہیں۔
اس کے ساتھ ترک میڈیا نے لکھا کہ پارلیمانی عدم اعتماد کے ووٹ کے نتیجے میں عمران خان کو ہٹانے کے ایک دن بعد پاکستان بھر کے شہروں میں عمران خان کی حمایت اور "غیر ملکی مداخلت" کے خلاف بڑے پیمانے پر ریلیاں نکالی گئی ہیں۔
ایک دوسرے ٹوئٹ میں ٹی آر ٹی نے کہا کہ پاکستان میں عمران خان کے حامی عدم اعتماد کے ووٹ میں اقتدار سے بے دخل ہونے کے ایک دن بعد اتوار کے روز سڑکوں پر نکل آئے۔ یہ سب کچھ اس وقت ہو رہا ہے جب ملک کی پارلیمنٹ پیر کو نئے وزیر اعظم کا انتخاب کرنے والی ہے۔
الجزیرہ نے بھی پی ٹی آئی کے احتجاج کو خصوصی کوریج دی۔
