بین الاقوامی شہرت یافتہ جریدے "دی ڈپلومیٹ" نے اپنی تازہ رپورٹ میں پاک بھارت جنگ کے تناظر میں پاکستان کی بھرپور سفارتی کامیابی اور بھارت کی واضح ناکامی کا اعتراف کیا ہے۔ رپورٹ کے مطابق پاکستان نے نہ صرف عسکری میدان میں بھرپور دفاع کیا بلکہ عالمی سطح پر اپنی ساکھ کو مزید مستحکم کیا۔
جریدے کے مطابق بھارت کو جنگی محاذ پر پاکستان کے ہاتھوں شدید نقصان اٹھانا پڑا، جب کہ سفارتی سطح پر بھی نئی دہلی کو منہ کی کھانا پڑی۔ پاکستان کی بروقت اور مؤثر جوابی کارروائی نے دنیا پر واضح کر دیا کہ پاکستان اپنے دفاع کے لیے ہر دم تیار ہے اور کسی بھی جارحیت کا منہ توڑ جواب دینے کی صلاحیت رکھتا ہے۔
دی ڈپلومیٹ نے یہ بھی لکھا کہ پاکستان نے اس کشیدہ صورتحال میں دانشمندی اور سیاسی بصیرت کا مظاہرہ کرتے ہوئے عالمی برادری کا اعتماد حاصل کیا، جب کہ امریکہ سمیت کئی اہم ممالک نے پاکستان کے مؤقف کو سراہا۔
رپورٹ میں مزید کہا گیا کہ پاک چین دفاعی تعاون نے بھارتی فضائیہ کو بھاری نقصان پہنچایا، جس کے نتیجے میں رافیل طیاروں کی تباہی بھارت کے لیے عالمی سطح پر سبکی کا باعث بنی۔
بھارت کی جانب سے پہلگام حملے کا الزام پاکستان پر دھرنے کی کوشش بھی ناکام ثابت ہوئی، کیونکہ بھارت کوئی بھی ٹھوس یا قابل قبول ثبوت فراہم کرنے میں ناکام رہا۔ دوسری جانب، پاکستان کی فوجی حکمت عملی اور عالمی سفارتی تعاون نے بھارت کے جارحانہ عزائم کو خاک میں ملا دیا۔
دی ڈپلومیٹ کی اس رپورٹ نے ایک بار پھر یہ ثابت کر دیا ہے کہ پاکستان نہ صرف ایک ذمہ دار ایٹمی طاقت ہے بلکہ سفارتی اور عسکری سطح پر بھی اپنی مؤثر حکمت عملی سے خطے میں امن و استحکام کا داعی ہے۔
