پانچ مطالبات پورے کرو گے تو قرض ملے گا، آئی ایم ایف

آئی ایم ایف کا پاکستان سے ڈومور کا مطالبہ۔۔ 5 مطالبات رکھ دیئے

آئی ایم ایف سے مزید ڈیل کرنی ہے تو مزید مطالبات پورے کرنے ہونگے، آئی ایم ایف نے پاکستان سے ڈو مور کا مطالبہ کردیا ہے،آئی ایم ایف نے پاکستان سے اگلی ڈیل کے لیے پانچ مطالبے پورے کرنے کی شرط عائد کردی ہے،ٹیکس چھوٹ کا خاتمہ اور اسٹیٹ بینک کی خود مختاری بھی ان شرائط میں شامل ہیں۔

مشیر خزانہ شوکت ترین نے میڈیا سے گفتگو میں بتایا کہ آئی ایم ایف سے معاہدہ آخری مراحل میں ہیں جلد خوشخبری ملے گی، ٹیکس استثنی کا خاتمہ اور اسٹیٹ بینک کی خود مختاری کے بل تیار کر لیے ہیں، وزارت قانون، قانونی بلز کے مسودے کو حتمی شکل دے رہی ہے،کرنسی ریٹ اور مانیٹری پالیسی اسٹیٹ بینک کا دائرہ کار ہے۔

شوکت ترین نے بتایا کہ اس سال شرح نمو 5 فیصد سے زیادہ رہے گی،غریبوں کو امداد دیں گے اور انہیں بغیر شرح سود کے قرض فراہم کریں گے،آئندہ 4 سال میں حکومت 1400 ارب روپے کامیاب پاکستان پروگرام پر خرچ کرے گی۔

انہوں نے بتایا کہ کامیاب جوان پروگرام کے لیے آئندہ چار سال میں ایک سو 40 ارب روپے کے قرض دیں گے،احساس پروگرام کے لیے 260 ارب روپے رکھے گئے ہیں اور احساس راشن کے لیے 350 ارب روپے رکھے گئے ہیں۔

مشیر خزانہ نے کہا کہ کورونا کے دوران بھی کاروبار کو مالی وسائل فراہم کیے،حکومت غریبوں کے لیے وہ کر رہی ہے جو ضروری تھا،آئی ایم ایف پروگرام کے باوجود غریبوں کی مدد کریں گے،حکومت کا یہ کام ہے کہ سماجی فلاح کے لیے کام کرے لیکن فنڈز کی کمی باعث مشکل ہوتا ہے،حکومت 5 فیصد معاشی ترقی کا ہدف رواں مالی سال حاصل کرے گی، معاشی شرح نمو کا اثر پائیدار ہونے کی شرط پر عوام تک پہنچے گا۔