یہ لوگ موجودہ دور کے فرعون ہیں جو موت کو فراموش کرچکے ہیں!: صاحبزادہ حامد رضا
عوام کو ملک کے معاشی بحران میں قربانی دینے کا سبق دینے والی بیورو کریسی نے نگران وزیراعلیٰ پنجاب کے لیے قبرستان میں بھی کارپٹ بچھا دیئے۔ نگران وزیراعلیٰ پنجاب آج اپنے سسر کی قبر پر فاتحہ خوانی کے لیے گئے تو قبرستان میں سرخ قالین بچھا دئیے گئے جس کی تصاویر سوشل میڈیا پر وائرل ہونے کے بعد سیاسی، سماجی وصحافیوں حلقوں کے علاوہ عوام کی طرف سے شدید ردعمل دیکھنے میں آرہا ہے۔ سوشل میڈیا پر کسی نے کہا کہ یہ فرعون ہیں اور کسی نے کہا کہ ان کی آنکھیں فلسطین کے شہداء کیلئے کیسے نم ہو سکتی ہیں؟
چیئرمین سنی اتحاد کونسل صاحبزادہ حامد رضا نے شدید ردعمل کا اظہار کرتے ہوئے لکھا کہ: محسن نقوی صاحب یاد رکھیں مرنے کے بعد آپ کو منوں مٹی تلے دفنایا جائے گا اور وہاں استقبال کرنے کے لئے ریڈکارپٹ نہیں ہوگا بلکہ اعمال کا حساب کتاب ہو گا۔ یہ لوگ موجودہ دور کے فرعون ہیں جو موت کو فراموش کرچکے ہیں!
سینئر صحافی وتجزیہ نگار اوریا مقبول جان نے لکھا کہ: جو نگران وزیر اعلیٰ پنجاب اپنے سسر کی قبر پر فاتحہ پڑھنے جائے اور قبرستان میں قالین بچھا دئیے جائیں ،اسے موت کا کیا اندازہ ہو گا ، اس کی آنکھ غزہ کے شہیدوں کیلئے کیسے نم ہو سکتی ہے ، اسی لیے اس نے پنجاب میں دو ہفتے کے جشن کا افتتاح کیا ہے !
رہنما پاکستان تحریک انصاف شہباز گل نے لکھا کہ: قبرستان میں قالین ؟بھوکی ننگی مفلس قوم پر مسلط غیر آئینی ٹولے کے ششکے چیک کریں!
سینئر صحافی احتشام الحق نے لکھا کہ: ہم اس لیے بھی ترقی نہیں کرسکتے کیونکہ ہم زمین اور مٹی میں قدم رکھنا پسند ہی نہیں کرتے، ہم غرور، تکبر اور اور غیرانسانی حرکتوں باز نہیں آتے، یہ قبرستان کی تصویر ہے۔
سینئر صحافی وتجزیہ نگار سمیع ابراہیم نے لکھا کہ: جس جس محسن نقوی کو میں جانتا ہوں اس سے مجھے ہرگز توقع نہیں تھی کی وہ قبرستان میں ریڈ کارپٹ کروائے گا! بھائی اپنا قبلہ بدلو،اپنے ساتھی اور مشیر بدلو، یہ تمہیں مکمل تباہی کی طرف لے کر جا رہے ہیں!
میر محمد علی خان نے لکھا کہ: قبرستان میں قالین ؟ کفن میں جیبیں ؟ قبر میں تکیہ ؟ احرام میں ریشم؟ نماز میں سجدے کے لیے خادمین؟ رمضان میں روزے رکھنے کے لیے نوکر ؟ حج آن لائن؟ نماز جنازہ 7 سٹار ہوٹل میں؟ قُل اور سوئم Destination Qul فرینچ ریویئرا پر ؟ جو اُوپر لکھا ہے وہی آہستہ آہستہ ہو گا۔
شہر بانو نے لکھا کہ: تخت طاؤس پر آ بیٹھے ہیں دربان یہاں ! ایک انتہائی غریب ملک جو آئی ایم ایف کے قرضوں میں جکڑا ہوا ہے اور جس کی عوام بھوک سے مر رہی ہے! ان کے ٹیکس سے پیسوں سے اپنے سسر کی قبر پر فاتحہ پڑھنے کے لیے بھی قبرستان میں ریڈ کارپٹ بچھایا گیا!
اختر علی نے لکھا: یہ محسن نقوی ہے اور بدقسمتی سے پنجاب کا نگران وزیر اعلی بنا دیا گیا ہےاور چھ مہینے سے زائد کا ٹائم ہو گیا یعنی نگران وزیر اعلی ہے! قبرستان میں بھی اس کے لیے ریڈ کارپٹ ڈالی جا رہی ہے، اس بندے کو کیا لگتا ہے اس بندے نے مرنا نہیں ہے یا اس کے اندر عقل نہیں ہے!
شہید صحافی ارشد شریف کی بیوہ جویریہ صدیق نے لکھا: قالین کے بجائے اگر قبرستان میں صفائی کردیتے، فٹ پاتھ بنا دیتے، گھاس کاٹ دیتے، اپنے پیاروں سے ملنے آنے والوں کے لیے بینچ اور پانی کا انتظام کردیتے تو کیا ہی بات ہوتی، پاکستان کے بیشتر قبرستان بھوتوں کی آماجگاہ لگتے ہیں!
سینئر صحافی سید طلعت حسین نے لکھا کہ: مقصد سے قطع نظر، قبروں کے درمیان سرخ قالین بچھانے کا خیال ناقابل یقین حد تک احمقانہ اور سنگدل ہے! قبرستان کے تقدس کی یہ بے حرمتی، اس زمین پر قدم نہ رکھنے کا کھوکھلا تکبر یہ ظاہر کرتا ہے کہ طاقتور کس قدر نیچے گر سکتا ہے۔
سوشل میڈیا پر تنقید کے بعد نگران وزیراعلیٰ پنجاب محسن نقوی نے اپنا وضاحتی پیغام جاری کرتے ہوئے کہا کہ حقائق کو مسخ کیا جا رہا ہے۔ محسن نقوی نے لکھا کہ: ملک دشمن دہشت گردوں کے خلاف جنگ میں جام شہادت نوش کرنے والے ایس ایس پی اشرف مارتھ شہید کی قبر پر سلامی کی تقریب سے اگر کسی کو تکلیف ہوتی ہے تو اس کا علاج اللہ تعالی ہی کر سکتے ہیں۔
انہوں نے لکھا کہ: شہیدوں کے ہر قبرستان کے راستوں کو سرخ پھولوں سے بھر بھی دیا جائے تو بھی ان کا قرض ادا نہیں کیا جا سکتا۔ منڈی بہاؤالدین والی تقریب شہید کو سلامی دینے کے لیے تھی لیکن اس کے بجائے صرف ریڈ کارپٹ دکھایا جا رہا ہے۔ نہ مجھے کبھی پروٹوکول لینے کا شوق تھا اور نہ ہی میں نے بطور وزیر اعلیٰ سرکاری پروٹوکول لیا، لہٰذا حقائق مسخ کرنے سے پرہیز کیا جائے تو بہتر ہو گا۔
- Featured Thumbs
- https://www.siasat.pk/data/files/s3/2مہھسیسنناقکسجکسھددگ.png
