سابق وزیراعظم نواز شریف کی وطن واپسی کی راہیں ہموار ہوگئی ہیں، حکومت نے قانونی ٹیم بھی تشکیل دیدی ہے۔
تفصیلات کے مطابق تاحیات نااہلی کے خلاف بل سینیٹ کے بعد قومی اسمبلی سے منظور ہونے کے بعد وزیراعظم شہباز شریف نے اپنے بھائی اور سابق وزیراعظم میاں نواز شریف کی وطن واپسی کیلئے قانونی ٹیم تشکیل دیدی ہے۔
ٹیم کی سربراہی وفاقی وزیر قانون اعظم نذیر تارڑ کو سونپی گئی ہےجبکہ باقی ممبران میں عطاء اللہ تارڑ، عرفان قادر اور دیگر قانونی مشیر، نواز شریف کے کیسز کی پیروی کرنے والے امجد پرویز و دیگر وکلاء بھی شامل ہوں گے۔
قانونی ٹیم کو نواز شریف کے عدالتوں میں کیسز کی کارروائی کو تیز کرنے اور نااہلی و دیگر کیسز کے خاتمے کیلئے کام تیز کرنے کا ٹاسک دیا گیا ہے، ٹیم نواز شریف کی وطن واپسی کی راہ میں حائل تمام رکاوٹؤں کو بھی دور کرنے میں اپنا کردار ادا کرے گی۔
خیال رہے کہ تاحیات نااہلی کو پانچ سال کی مدت تک محدود رکھنے سے متعلق بل سینیٹ کے بعد قومی اسمبلی سے بھی منظور کرلیا گیا ہے، صدر مملکت ڈاکٹر عارف علوی کے بیرون ملک ہونے کی وجہ سے قائم مقام صدر مملکت چیئرمین سینیٹ صادق سنجرانی اس بل کی توثیق کریں گے جس کے بعد زیادہ سےزیادہ نااہلی کی مدت پانچ سال ہوجائے گی اور اس طرح نواز شریف کی سیاست میں واپسی کیلئے قانونی طریقہ کار اپنایا جائے گا۔
