بالی ووڈ کے سینئر اداکار نصیر الدین شاہ کا کہنا ہے کہ اگر مغل بادشاہ اتنے ہی ظالم تھے تو بھارتیوں کو چاہیے کہ ان کا بنایا ہوا تاج محل، لال قلعہ اور قطب مینار گرا دیں۔
تفصیلات کے مطابق بھارتی اداکار نصیرالدین شاہ جلد اپنی نئی ویب سیریز "تاج ڈیوائڈڈ بائے بلڈ" میں شہنشاہِ ہند بادشاہ جلال الدین اکبر کا کردار ادا کرتے نظر آئیں گے۔ جبکہ بھارت میں مغل بادشاہوں کے حوالے سے مشہور ہے کہ وہ ظالم حکمران تھے یہی وجہ ہے کہ ویب سیریز کا ٹیز ریلیز ہوتے ہی سوشل میڈیا پر بھارتی صارفین نے مغلوں کو ظالم قرار دینا شروع کر دیا ہے۔
گزشتہ دنوں بھارتی میڈیا کو دیئے انٹرویو میں نصیرالدین شاہ نے مغل بادشاہوں پر تنقید کرنے والوں کو مخاطب کرتے ہوئے کہا کہ جس طرح بھارتی حکومت نے مغلوں کے بسائے ہوئے شہروں، گاؤں اور قصبوں کے نام تبدیل کردیئے ہیں اگر انہیں مغل بادشاہوں سے اتنی ہی نفرت ہے تو تاج محل، قطب مینار اور لال قلعہ کو بھی گرا دینا چاہیے۔
نصیر الدین شاہ نے مزید کہا کہ کئی سالوں سے بھارت میں مغل بادشاہوں کو لٹیرا قرار دیا جا رہا ہے جبکہ بالی ووڈ کی فلموں میں انہیں ظالم ولن کے طور پر دکھایا جاتا رہا ہے۔ مسئلہ یہ ہے کہ ہمارے لوگ مغلوں اور ترکوں میں فرق ہی نہیں جانتے۔ وہ محمود غزنوی اور نادر شاہ کو بھی مغل سمجھتے ہیں۔
نصیر الدین شاہ کا کہنا تھا کہ بھارتی عوام سمجھتے ہیں کہ مغل بھارت کو لوٹنے آئے تھے جبکہ مغل تو یہاں اپنا گھر بسانے آئے تھے اور انہوں نے ایسا ہی کیا جس سے کوئی انکار نہیں کر سکتا۔
واضح رہے کہ بالی ووڈ کی ویب سیریز “تاج ڈیوائڈڈ بائے بلڈ” میں نصیر الدین شاہ سمیت بھارت کے لیجنڈ اداکار دھرمندر بھی صوفی بزرگ شیخ سلیم چشتی کا کردار ادا کریں گے جو کہ شہنشاہ ہند کے ساتھ اہم کردار نبھائیں گے۔ سیریز 3 مارچ کو بھارتی اسٹریمنگ سائٹ زی فائیو پر ریلیز کی جائے گی۔
Last edited by a moderator:
