مینارپاکستان دست درازی کیس، عائشہ اکرم نے گرفتار ملزم کے حق میں بیان دیدیا
مینارِ پاکستان کے گریٹر اقبال پارک میں 14 اگست 2021 کے روز دست درازی کا شکار ہونے والی ٹک ٹاکر عائشہ اکرم نے دست درازی کیس کی سماعت کے دوران لاہور کی مقامی عدالت میں بیان ریکارڈ کرایا ہے جس میں کہا ہے کہ ملزم افتخار کے بے گناہ ہونے کا یقین ہے۔
عائشہ اکرم نے ملزم افتخار کی ضمانت کے لیے ایڈیشنل سیشن جج لاہور کے روبرو بیان ریکارڈ کرایا ہے۔ متاثرہ خاتون نے عدالت میں ریکارڈ کرائے گئے بیان میں کہا ہے کہ افتخار احمد کے خلاف شک اور غلط فہمی کی بنیاد پر مقدمہ درج کرایا۔ مطمئن ہوں کہ افتخار واقعے میں ملوث نہیں، عدالت ملزم افتخار کو ضمانت پر رہا کرے تو مجھے اعتراض نہیں۔
ایڈیشنل سیشن جج نے ٹک ٹاکر عائشہ اکرم کے اس بیان کے بعد ایک لاکھ روپے کے مچلکوں کے عوض افتخار احمد کی ضمانت منظور کر لی۔ اس سے قبل افتخار احمد کو عائشہ اکرم نے شناخت پریڈ کے عمل میں باضابطہ شناخت کیا تھا۔
یاد رہے کہ مینارِ پاکستان لاہور کے گریٹر اقبال پارک میں رواں سال یومِ آزادی کے موقع پر خاتون ٹک ٹاکر سے دست درازی کا ناخوشگوار واقعہ پیش آیا تھا جو 3 روز بعد سوشل میڈیا کے ذریعے سامنے آیا۔ سیکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا تھا،
نوجوان ٹک ٹاکر کے کپڑے پھاڑ کر اسے ہوا میں اچھالتے رہے اور انہوں نے اس سے نقدی اور زیورات بھی چھین لیئے۔ پولیس واقعے سے بے خبر رہی، جس نے بعد میں خاتون کی درخواست پر 400 نامعلوم ملزمان کے خلاف مقدمہ درج کیا تھا۔
- Featured Thumbs
- https://www.siasat.pk/data/files/s3/ayesha-akram-112122.jpg
