روالپنڈی اسلام آباد یونین آف جرنلسٹس نے جنگ گروپ کیجانب سے اپنے ملازمین کے خلاف مذہبی منافرت پھیلانے کا مقدمہ درج کروانے کی شدید الفاظط میں مذمت کی ہے۔
تفصیلات کے مطابق آر آئی یو جے نے نے ویج ایوارڈ کے حقوق کی آواز بلند کرنے کی پاداش میں جنگ گروپ کے 7 ملازمین کے خلاف مذہبی منافرت کے مقدمے درج کروانے کے اقدام کی شدید مذمت کی ہے، راولپنڈی پولیس نے 47 ورکرز کی درخواست کو نظر انداز کرکے دباؤ کے تحت جنگ گروپ کے مالکان کی ایماء پر ورکرز کے خلاف سنگین دفعات کے تحت مقدمہ درج کیا۔
آر آئی یو جے نے جنگ انتظامیہ کے ان اوچھے ہتھکنڈوں کی مذمت کی اورکہا کہ چند سال پہلے جنگ گروپ کے مالک میر شکیل الرحمان خود توہین مذہب کے جھوٹے مقدمات کا سامنا کرچکے ہیں، آر آئی یو جے نے اس موقع پر ان کی بھرپور حمایت کرتے ہوئے اس مقدمے کو آزادی صحافت پر حملہ قرار دیا تھا مگر آج میر شکیل الرحمان کی ایماء پر ان کے ادارے کے ملازمین کے خلاف وہی ہتھکنڈے استعمال کیے جارہے ہیں جس کی وجہ سے متعدد ملازمین کی زندگیوں کو شدید خطرات لاحق ہوگئے ہیں۔
اعلامیہ میں کہا گیا ہے کہ پولیس نے دباؤ لے کر اپنی جانبداری کا کھلا ثبوت دیا ہے جبکہ قانون طور پر ایسی سنگین دفعات کے تحت مقدمہ صرف مجاز افسران کی مکمل انکوائری کے بعد ہی درج کیاجاسکتا ہے، آر آئی یو جے ورکرز کے بھرپور دفاع کا عزت کرتے ہوئے فوری طور پر مقدمہ خارج کرنے کا مطالبہ کرتی ہے اور اس ساری صورتحال کو مدنظر رکھتے ہوئے بھرپور احتجاجی تحریک شروع کرنے پر بھی غور کررہی ہے، ورکرز کے استحصال کی کسی کوشش کو کامیاب نہیں ہونے دیں گے۔
سینئر صحافی و پروڈیوسر عدیل راجا نے آرآئی یو جے کا اعلامیہ شیئر کرتے ہوئے کہا کہ جنگ گروپ کے مالک میر شکیل نے چند روپے بچانے کیلئے اپنے ملازمین پر مذہبی منافرت پھیلانے کے جھوٹے مقدمات درج کروادیئے ہیں۔
