لودھراں میں جہیز میں ہونڈا ون ٹو فائیو موٹرسائیکل نہ ملنے پر شادی سے انکار، بارات واپس چلی گئی۔۔
پولیس نے جہیز کا باقی دیا گیا سامان لڑکی کے اہلخانہ کو واپس دلوادیا۔ ملزمان نے شادی سے دو روز قبل موٹرسائیکل کی فرمائش کی جو پوری نہ ہونے پر شادی سے انکار کردیا گیا تھا۔
لڑکی والوں کے مطابق لڑکی سجی سنوری شادی ہال میں بیٹھی تھی کہ دلہا والوں نے رخصتی سے قبل موٹرسائیکل کا مطالبہ کیا جو لڑکی والوں نے پورا کرنے سے انکار کردیا، جس پر لڑکے والے بارات لیکر واپس چلے گئے۔
لودھراں پولیس کے مطابق لڑکی والوں نے جہیز کا سامان لڑکے والوں کو بھجوادیا تھا مگر رخصتی سے انکار کے بعد وہ ٹال مٹول کررہے تھے جس پر پولیس نے مداخلت کی اور دلہن کا سامان واپس کروادیا۔
دلہن کے والد نے ڈی پی او لودھراں کا شکریہ ادا کیا اور کہا کہ میں ان کا بہت مشکور ہوں، انہوں نے سامان کی واپسی میں ہمارے ساتھ بہت تعاون کیا ہے۔
دوسری جانب لڑکے والوں کا بھی موقف سامنے آگیا ہے، انہوں نے موٹرسائیکل کی ڈیمانڈ کی بات کو جھوٹ قرار دیا ۔
لڑکے کے اہلخانہ کے مطابق لڑکی کے اہلخانہ کی جانب سے دس مرلے کا پلاٹ اور دس تولے سونے کے مطالبے پر ہم نے شادی سے انکار کیا،موٹرسائیکل کے مطالبے والی بات جھوٹ ہے
