وزیر داخلہ رانا ثنانے پاکستان تحریک انصاف کو آزادی مارچ کی اجازت تو نہ دی ساتھ ہی چیئرمین پی ٹی آئی سے مارچ منسوخ کرنے کا کہہ دیا۔
میڈیا سے گفتگو میں وزیر داخلہ نے کہا کہ عمران نیازی سے کہتا ہوں کہ خونی انقلاب منسوخ کردے، آئین، قانون اور امن کا راستہ اپنائے،یہ ثبوت ہے کہ عمران نیازی سیاست نہیں کررہا، دہشت گردی پر اتر آیا ہے۔
رانا ثنا نے کہا کہ پاکستان تحریک انصاف عہدیداروں کےگھروں سے بھاری اسلحہ وگولہ بارود ملنا خونی مارچ کے ثبوت ہیں،لاہور پی ٹی آئی کے جنرل سیکریٹری کا گھر بارود خانہ نکلا۔
انہوں نے کہا کہ سیاست کے لبادے میں دہشت گردی کی سازش برداشت نہیں کریں گے، بے گناہ پولیس جوان کمال احمد کے سینے میں لگی گولی کہاں سے آئی،قوم نے دیکھ لیا۔
رانا ثنا نے کہا کہ ثابت ہوگیا کہ یہ پرامن سیاسی کارواں نہیں بلکہ مسلح لشکر کشی ہے،اس برآمدگی، پنجاب پولیس کے جوان کی شہادت کے بعد عمران نیازی پر اعتبار نہیں کرسکتے، وہ خیبرپختونخوا حکومت کے وسائل اور مشینری اپنے فساد کے لئے استعمال نہ کرے۔
وزیرداخلہ نے مزید کہا کہ معیشت کی بنیادوں میں بارود بھرنے والوں کو معاشرے کا امن تباہ نہیں کرنے دیں گے، آئین اور قانون پر سختی سے عمل ہوگا، قانون صرف اسے پکڑے گا جو قانون ہاتھ میں لے گا،عوام کے جان ومال کا تحفظ ہر قیمت پر یقینی بنائیں گے۔
پی ٹی آئی رہنماؤں کے گھروں پرپولیس کے چھاپوں کا سلسلہ جاری ہے،نواں کوٹ اورملتان روڈ پر چھاپوں کے دوران بجاش نیازی اور زبیرنیازی کے گھر سے بڑی تعداد میں جدید اسلحہ برآمد ہوا ہے۔
