بین الاقوامی شہریت یافتہ گلوکار و اداکار علی ظفر نے سیاست میں انٹری وے متعلق خبروں کی تردید کردی ہے۔
تفصیلات کے مطابق گلوکار واداکار علی ظفر نے مائیکروبلاگنگ ویب سائٹ ٹویٹر پر اپنا ایک ویڈیو بیان جاری کیا جس میں ان کا کہنا تھا کہ گزشتہ رات ٹورنٹو میں کانسرٹ سے قبل ساؤنڈ چیک کے دوران میں نے ایک ہوڈی پہنی تھی جس پر مختلف سیاسی جماعتوں کے انتخابی نشانات آویزاں تھے۔
علی ظفر نے کہا کہ یہ تصویر سوشل میڈیا پر شیئر کی جارہی ہے اور دعویٰ کیا جارہا ہے کہ میں نے غالبا سیاست میں قدم رکھ دیا ہے، اس ہوڈی پر تمام بڑی سیاسی جماعتوں کے نشانات ہیں اور انہی نشانات پر شیر کے نشان کے ساتھ "شیر آیا شیر آیا" لکھا ہوا ہے۔
علی ظفر نے وہ سفید رنگ کا ہوڈی ویڈیو میں بھی دکھایا جس پر "بلا"، "تیر" اور "شیر" کے نشانات پینٹ کیے گئے تھے۔
علی ظفر نے ویڈیو میں کہا کہ اس ہوڈی کو سیاسی یا غلط رنگ مت دیجیے، میں ایک آرٹسٹ ہوں جانے دیجیئے۔
خیال رہے کہ علی ظفرکی اس ہوڈی کی تصویر سوشل میڈیا پر "شیر آیا شیرآیا" کے نعرے کے ساتھ وائرل ہورہی تھی اور شیئر کرنےوالے یہ دعویٰ کررہےتھے کہ علی ظفر نے مسلم لیگ ن میں شمولیت اختیار کرلی ہے۔
