بھارتی یونیورسٹی کے شعبہ اردو میں علامہ اقبال کی تصویر لگانے پر تنازع کھڑا ہوگیا، سابق بنارس اور حالیہ وارانسی کی بنارس ہندو یونیورسٹی کے شعبہ اردو کی جانب سے ایک پوسٹر پر شاعر مشرق علامہ محمد اقبال کی تصویر استعمال کی گئی جس پر ان کو معافی مانگنی پڑی۔
تفصیلات کے مطابق بنارس ہندو یونیورسٹی کے شعبہ اردو نے علامہ اقبال کے یوم پیدائش کے موقع پر آن لائن تقریب ’یوم اردو‘ منعقد کرنے کا اعلان کیا گیا۔
مجوزہ ویبی نار کا پوسٹر سوشل میڈیا پوسٹر پر شاعر مشرق علامہ محمد اقبال کی تصویر استعمال کیا گیا، بعد ازاں جب پوسٹر سوشل میڈیا پر شیئر کیا گیا تو سخت گیر ہندو نظریاتی تنظیم راشٹریہ سویم سیوک سنگھ (آر ایس ایس) کی طلبہ تنظیم اکھل بھارتیہ ودیارتھی پریشد (اے بی وی پی) اور دیگر ہم خیال طلبہ تنظیموں نے پوسٹر میں علامہ اقبال کی تصویر پر ہنگامہ کھڑا کر دیا۔
ان تنظیموں نے موقف اختیار کیا کہ شعبہ اردو کی جانب سے پوسٹر پر یونیورسٹی کے بانی پنڈت مدن موہن مالویہ کی بجائے مصورِ پاکستان علامہ اقبال کی تصویر استعمال کی گئی۔
سخت گیر ہندو طلبہ تنظیموں کی جانب سے اس کو ناقابل برداشت قرار دے دیا۔
سوشل میڈیا پر ہنگامے کے بعد شعبہ اردو نے سخت گیر ہندو طلبہ تنظیموں سے معافی مانگی اور پوسٹر پر علامہ اقبال کی جگہ پنڈت مدن موہن مالویہ کی تصویر سے تبدیل بھی کر دیا، دوسری جانب یونیورسٹی انتظامیہ نے اس معاملے کی انکوائری کے لیے تحقیقاتی کمیٹی بھی تشکیل دے دی ہے۔
یونیورسٹی کے شعبہ اردو نے پوسٹر پر علامہ اقبال کی تصویر استعمال کرنے پر معافی مانگتے ہوئے موقف اختیار کیا کہ یہ ایک نادانستہ غلطی تھی جو شعبہ کی جانب سے سرزد ہو گئی۔
بعد ازاں یونیورسٹی کے فیکلٹی آف آرٹس کے آفیشل ٹوئٹر ہینڈل سے مدن موہن مالویہ کی تصویر والا نیا پوسٹر شیئر کرتے ہوئے کہا گیا کہ فیلکٹی آف آرٹس کا شعبہ اردو پوسٹر میں دی گئی تفصیلات کے مطابق ایک ویبی نار کا اہتمام کر رہا ہے، ’اس سے قبل سوشل میڈیا پر وائرل ہونے والے پوسٹر میں نادانستہ غلطی کی موجودگی پر ہم معذرت خواہ ہیں۔‘
