لاہور کی اسپیشل عدالت نے ایک کیس میں چالان جمع کروانے میں تاخیر پر ڈائریکٹر ایف آئی اے کی تنخواہ تاحکم ثانی روکنے کا حکم جاری کردیا ہے۔
خبررساں ادارے کی رپورٹ کے مطابق لاہور کی اسپیشل کورٹ سینٹرل میں جج بخت فخر بہزاد نے سفیر گوندل کے خلاف امیگریشن آرڈیننس اور پاسپورٹ ایکٹ کے تحت درج مقدمے پر سماعت کی اور فیصلہ جاری کیا۔
عدالت نے ملزمان کے خلاف چالان جمع کروانے میں تاخیرپر وفاقی تحقیقاتی ایجنسی اور وزارت داخلہ سے 5 سال سے زیر التواکیسز کا ریکارڈ طلب کرلیا اور کہا کہ ایف آئی اے کو بہت دلیری سےقانونی کارروائی کی خلاف ورزی کی عادت پڑگئی ہے۔
عدالت نے اپنے فیصلے میں لکھا کہ ایف آئی اے کی ایسی چالیں عدالتی نظام کو سبوتاژکرنے کی مترادف ہیں، ایسا لگتا ہے کہ ایف آئی اے ڈائریکٹرز اور ڈپٹی ڈائریکٹر خود کو قانون سے بالاتر سمجھتے ہیں، کیا یہ سب کچھ متعلقہ ایف آئی اے افسران کے علم میں لایا گیا تھا؟
عدالت نے ڈائریکٹر ایف آئی اے کے خلاف کارروائی کیلئے اظہار وجوہ کا نوٹس جاری کرتے ہوئے انہیں آئندہ سماعت پر ذاتی حیثیت میں پیش ہونے کا حکم دیا اور ساتھ ہی تاحکم ثانی ان کی تنخواہ روکنے کا بھی حکم صادر فرما دیا ہے۔
- Featured Thumbs
- https://www.siasat.pk/data/files/s3/fia11h1.jpg
