حکمران اتحاد پاکستان ڈیموکریٹک موومنٹ (پی ڈی ایم ) کے سربراہ مولانا فضل الرحمان کی جانب سے ضمنی انتخابات کے بائیکاٹ کے اعلان کے باوجود ن لیگ نے انتخابات میں حصہ لینے کی تیاری شروع کردی ہے۔
تفصیلات کے مطابق حکمران اتحاد ضمنی انتخابات میں حصہ لینے یا نا لینےکے معاملے پر اختلافات کا شکار ہوگیا ہے، ن لیگی امیدوار نے پی ڈی ایم سربراہ مولانا فضل الرحمان کی جانب سے ضمنی انتخابات کے بائیکاٹ کے اعلان کوہوا میں اڑاتےہوئے میدان میں اترنا شروع ہوگئے ہیں۔
میڈیا رپورٹس کے مطابق پی ڈی ایم اور پیپلزپارٹی میں ضمنی انتخابات کے بائیکاٹ کے معاملے پر اختلافات کھل کر سامنے آگئےہیں،ن لیگ کی جانب سے تمام جماعتوں کی جانب سے متفقہ فیصلہ کرنےکی تمام کوششیں بھی رائیگاں چلی گئی ہیں،اور ن لیگی امیدواروں نے انتخابات میں حصہ لینے کیلئے کاغذات نامزدگی بھی جمع کروانا شروع کردیئے ہیں۔
پیپلزپارٹی نے بائیکاٹ کی مخالفت کرتے ہوئے موقف اپنایا ہے کہ پیپلزپارٹی اب پی ڈی ایم اتحاد کا حصہ نہیں رہی ہے اس لیے وہ پی ڈی ایم قیادت کے فیصلے ماننے کی پابند نہیں ہے اور اپنے سیاسی فیصلے کرنے میں مکمل طور پر آزاد ہے۔
پیپلزپارٹی ذرائع کا کہنا ہے کہ پی ڈی ایم قیادت نے انتخابات کے بائیکاٹ کے حوالے سے فیصلہ کرنے سے پہلے مشاورت نہیں کی، اگر مشاورت کی جاتی تو اس معاملے میں ضرور سوچا جاتا۔
