پاکستان تحریک انصاف سے وابستہ گلوکار سلمان احمد نے کہا ہے کہ شیر افضل مروت ایک رانگ نمبر ہیں۔
تفصیلات کے مطابق سلمان احمد اور شیر افضل مروت کے درمیان سماجی رابطے کی ویب سائٹ ایکس پر لفظی جنگ جاری ہے، سلمان احمد نے اپنی ایک ٹویٹ میں شیر افضل مروت کو آڑے ہاتھوں لیتے ہوئے کہا کہ شیر افضل مروت خرم روکھڑی کی طرح رانگ نمبر ہیں۔
انہوں نے شیر افضل مروت کو مخاطب کرتے ہوئے کہا کہ آپ نے اپنے لیڈر کا غلط فائدہ اٹھایا، آپ کو سائیڈ لائن کرکے عمران خان نے درست فیصلہ کیا ہے۔
گلوکار نے مزید کہا کہ سچائی کی نشاندہی کرنے پر عادل راجا اور حیدر مہدی دونوں کی حمایت کرتے ہیں۔
سلمان احمد کی اس ٹویٹ پر شیر افضل مروت نے بھی جوابی وار کیا اور کہا کہ آپ کا بیان آپ کی سوچ کا عکاس ہے، آپ ایسے متنازعہ بیان سے لوگوں کو اپنی طرف متوجہ کرنے کی کوشش کررہے ہیں، آپ اور آپ جیسے دو غداروں سے میری سوشل میڈیا ٹیم نمٹے گی۔
شیر افضل مروت نے سلمان احمد کووارننگ دیتے ہوئے کہا کہ 5 اپریل تک کا انتظار کریں، آپ کو جواب ضرور ملے گا۔