سابق معاون خصوصی شہزاد اکبر نے پیپلزپارٹی کے رہنما ندیم افضل چن کی جانب سے تنقیدی بیان پرردعمل دیدیا ۔
تفصیلات کے مطابق مرزا شہزاد اکبر نے مائیکروبلاگنگ ویب سائٹ ٹویٹر پر جاری ایک بیان میں کہا کہ ندیم افضل چن ایک مطلبی اور موقع پرست انسان ہیں، انہوں نے پہلے آصف علی زرداری کو دغا دے کر جنرل فیض کی ایماء پر پی ٹی آئی میں شمولیت اختیار کی، خوب مزے کیے اور سارا دن اپنے سیاسی مخالفین کے خلاف کیس بنوانے کی کوششیں کیں۔
شہزاد اکبر نے کہا کہ میرے انکار پہ ندیم افضل چن میرے خلاف ہوئے اور اب دوبارہ جنرل ندیم کی ایماءپر پیپلزپارٹی میں شمولیت اختیار کی،ندیم افضل چن نیب کی گواہوں کی لسٹ میں بطور گواہ بھی شامل ہیں۔
خیال رہے کہ ندیم افضل چن نے ایک موقع پر گفتگو کرتے ہوئے کہا تھا کہ نیب نے مجھے القادر ٹرسٹ میں بلایا تھا جیسے تمام کابینہ ارکان کو طلب کیا، میں نے نیب کو وہی سب بتایا جو کابینہ میں ہوا، میں اس وقت عمران خان سے کہتا تھا کہ شہزاد اکبر ایک فراڈ ہے اور یہ آپ کو مروائے گا، لوگ آج بولتے ہیں جب عمران خان اقتدار میں نہیں ہے، میں اس وقت عمران خان کے سامنے باتیں کرتا تھا جب وہ اقتدار میں تھے۔
ندیم افضل چن نے کہا کہ میرا نظریہ کبھی قیدیوں اور مظلوموں کے خلاف بات کرنے کا نہیں ہے، مجھے اگر کسی عدالت میں گواہی کیلئے بلایا جائے گا تو میں واضح کردوں کہ میں ہرگزگواہی نہیں دوں گا۔
- Featured Thumbs
- https://www.siasat.pk/data/files/s3/2nannnsshhahzadabhahr.png
