پاکستان کو شکست دینے کےبعد افغان کھلاڑی نے مین آف دی میچ ایوارڈ پاکستان میں غیر قانونی طور پر رہنے والے افغان مہاجرین کے نام کردیا۔
تفصیلات کے مطابق ورلڈ کپ 2023 میں افغانستان نے پاکستان ٹیم کو شکست دی ، اپنی ٹیم کو فتح دلوانے میں افغان کھلاڑی ابراہیم زردان نے اہم کردار ادا کیا جس پر انہیں مین آف دی میچ کا ایوارڈ دیا گیا۔
ایوارڈ وصول کرتے ہوئے ابراہیم زردان نے کہا کہ میں یہ ایوارڈ پاکستان میں غیر قانونی طور پر مقیم افغان مہاجرین کے نام کرتا ہوں جنہیں جبری طور پر واپس افغانستان بھیجا جارہا ہے۔
ابراہیم زردان کے اس بیان پر سوشل میڈیا صارفین کا ردعمل آنا بھی شروع ہوگیا ہے، افغان باؤلر راشد خان کے فینز کے بنائے گئے ایک ٹویٹر اکاؤنٹ سے ابراہیم زردان کے بیان کا خیر مقدم کیا گیا اور کہا گیا کہ افغان کھلاڑی نے اس مشکل کے وقت میں اپنے لوگوں کیلئے دل کھول کر حمایت کا اظہار کیا۔
صباحت زکریا نامی ایک صارف نے بھی ابراہیم زردان کے بیان کا خیر مقدم کیا۔
کچھ صارفین نےابراہیم زردان کے بیان پر تنقید بھی کی اور موقف اپنایا کہ روس اور امریکہ کے افغانستان میں حملوں کے دوران ہزاروں کی تعداد میں افغان مہاجرین نے پاکستان میں پناہ لی ، افسوس ہے کہ ہم نے ایسے لوگوں کی مدد کی۔