ملک میں سیاسی بے یقینی کےباوجود معاشی میدان سے اچھی خبر آرہی ہے،اسٹاک مارکیٹ میں زبردست تیزی ریکارڈ کی گئی ہے۔
تفصیلات کے مطابق آج کاروبار کے دوران کراچی اسٹاک ایکسچینج میں 255 پوائنٹس سے زائد کا اضافہ ہوا ، مارکیٹ میں یہ اضافہ مثبت صفراعشاریہ59 فیصد کی شرح سے تبدیلی لایا۔
گزشتہ روز 43ہزار 719 پوائنٹس کی سطح پر بند ہونے والا ہنڈرڈ انڈیکس آج کاروبار کا اختتام پر255اعشاریہ87 پوائنٹس اضافے کے بعد 43ہزار975اعشاریہ69 پوائنٹس کی سطح پر بند ہوا۔
میڈیا رپورٹس کے مطابق آج مجموعی طور پر 23 کروڑ65لاکھ سے زائد حصص کے سودے ہوئے، گزشتہ روز خرید وفروخت ہونے والے شیئرز کی تعداد18کروڑ 90 لاکھ41 ہزار سے زائد تھی۔
دوسری جانب انٹربینک مارکیٹ میں حوصلہ افزاء صورتحال نظر نہیں آرہی،اسٹاک مارکیٹ میں سرمایہ کاروں کے اعتماد کے باوجود انٹر بینک مارکیٹ میں روپے کی قدر میں کمی دیکھی جارہی ہے۔
اسٹیٹ بینک آف پاکستان کیجانب سے جاری کردہ اعدادوشمار کے مطابق گزشتہ روز179 روپے22 پیسے میں فروخت ہونے والا امریکی ڈالر آج مزید 22 پیسے مہنگا ہونے کے بعد 179روپے 44 پیسے کا ہوگیا ہے۔
