نیوزی لینڈ اور پاکستان میں 5 ٹی ٹوینٹی میچز پر مشتمل سیریز کا پہلا میچ 18 اپریل کو ہونا ہے : رپورٹ
نیوزی لینڈ کے کھلاڑیوں کی طرف سے پاکستان کرکٹ ٹیم کے خلاف ٹی 20 سیریز کھیلنے کے بجائے انڈین پریمیئر لیگ (آئی پی ایل) کھیلنے کے فیصلے پر قومی فاسٹ بائولر جنید خان نے شدید تنقید کر دی۔ سوشل میڈیا ویب سائٹ ایکس (ٹوئٹر) پر اپنے پیغام میں جنید خان نے لکھا کہ: لیگز کو بین الاقوامی سیریز پر ترجیح دیتے دیکھ کر انتہائی افسوس ہو رہا ہے، انٹرنیشنل ٹیم نے ہی انہیں اس قابل بنایا ہے کہ وہ اب فرنچائز ٹیموں کے لیے کھیل سکتے ہیں۔
افسوس ہے کہ بین الاقوامی کرکٹ سیریز کے لیے نیوزی لینڈ کے 11 سے 12 سینئر کھلاڑی دستیاب ہی نہیں ہیں جن میں سے 9 کھلاڑی آئی پی ایل میں شرکت کر رہے ہیں جبکہ ایک کھلاڑی کائونٹی کرکٹ کھیلنے میں مصروف ہے۔ نیوزی لینڈ اور پاکستان کے درمیان 5 ٹی ٹوینٹی میچز پر مشتمل سیریز کا پہلا میچ 18 اپریل 2024ء کو ہونا ہے جس کے لیے کیوی ٹیم 12 اپریل کو پاکستان آنے کے لیے روانہ ہو گی۔
نیوزی لینڈ کے آئی پی ایل میں شریک کھلاڑیوں میں کپتان کین ولیمن، راچن روندرا، گلین فلپس، ڈیرل مچل، میٹ ہینری، لوکی فرگوسن، ڈیوان کانووے اور ٹرینٹ بولٹ شامل ہیں۔ ول ینگ کائونٹی کرکٹ کھیلنے میں مصروف ہیں جبکہ کرکٹ سیریز کے لیے گھریلو مصروفیات کے باعث ٹام لیتھم دستیاب نہیں ہوں گے۔
واضح رہے کہ نیوزی لینڈ کی طرف سے پاکستان کے خلاف ٹی 20 سیریز کے لیے سکواڈ کا اعلان کیا جا چکا ہے، سیریز کے لیے پہلی دفعہ مائیکل بریسویل کو نیوزی لینڈ کرکٹ ٹیم کا کپتان مقرر کیا گیا ہے۔ کیوی سکواڈ میں مائیکل بریسویل کے علاوہ ایش سودھی، ٹم سائفرٹ، بین سیئرز، جمی نیشم، ایڈم ملنے، کول مک کونچی، بین لسٹر، ڈین فاکس کرافٹ، جیکب ڈفی، جوش کلارکسن، مارک چیپمین اور فن ایلن شامل ہیں۔
