گزشتہ روز پاکستان اور افغانستان کا میچ دیکھنے کیلئے سابق پاکستانی کپتان شاہد آفریدی بھی اپنے اہلخانہ کے ہمراہ دبئی اسٹیڈیم پہنچے تو ٹیم میں کھیلنے والے قومی کرکٹر شعیب ملک انہیں ملنے کیلئے ان کے قریب چلے گئے اور سلیوٹ کیا جس کی ویڈیو سوشل میڈیا پر وائرل ہو گئی۔
ویڈیو میں دیکھا جا سکتا ہے کہ شعیب ملک چل کر اس اسٹینڈ کی طرف آئے جہاں شاہد آفریدی موجود تھے انہوں نے ہاتھ ہلا کر سابق کپتان کو متوجہ کیا اور پھر انہیں ہاتھ اٹھا کر سلیوٹ بھی کیا جب کہ ان کے اس سلیوٹ کے جواب میں شاہد آفریدی نے بھی ہاتھوں سے تھمبس اپ کا اشارہ کر کے میچ کیلئے نیک تمناؤں کا اظہار کیا۔
دبئی اسٹیڈیم میں موجود کرکٹ شائقین نے دونوں کھلاڑیوں کے مابین احترام بھرے اس انداز کو کیمرے کی آنکھ سے محفوظ کر لیا اور بعد ازاں اس ویڈیو پر متعدد تبصرے کیے جا رہے ہیں۔
