رمضان المبارک کے مہینے میں حکومت کی جانب سے شہریوں میں غیر معیاری سستے آٹے کی تقسیم کے معاملے پر عوام پھٹ پڑی ہے۔
تفصیلات کے مطابق سوشل میڈیا پر سامنےآنے والی تفصیلات اور ویڈیوز کے مطابق حکومت کی جانب سے رمضان المبارک میں عوام میں غیر معیاری اور چوکر ملے آٹےکی تقسیم کا انکشاف ہوا ہے، 648 روپے کا 10 کلو آٹے کا تھیلا خریدنے والے عوام اندر سے چوکر نکلنے پر سراپا احتجاج ہیں جن کی ویڈیوز بھی سوشل میڈیا پر وائرل ہورہی ہیں، حکومت کی جانب سے اس اقدام پر سوشل میڈیا صارفین بھی پھٹ پڑے ہیں۔
صحافی شاکر محمود اعوان نے ایسی ویڈیوز شیئر کرتے ہوئے کہا کہ وزیراعظم شہباز شریف کی جانب سے غریب عوام کو آٹے کی جگہ چوکر دی جارہی ہے وہ بھی 648 روپے میں 10 کلو ، جو کہ مارکیٹ سے بھی کئی گنا مہنگی ہے۔
پی ٹی آئی رہنما اور عثمان ڈار کی والدہ ریحانہ ڈار نے کہا کہ سیالکوٹ میں پنجاب حکومت کی جانب سےغیر معیاری آٹے کی تقسیم انتہائی افسوسناک معاملہ ہے، عوام کو چوکر ملا آٹا دے کر تضحیک کا نشانہ بنایا جارہا ہے اور ساتھ ہی ان کی صحت سے بھی کھیلا جارہا ہے۔
عمران بھٹی نے کہا کہ رمضان ریلیف کے نام پر شہریوں کو چوکر ملا آٹا دیا جارہا ہے، جو کام مافیا کرتا تھا اب وہ حکومت سرکاری سطح پرکررہی ہے۔
عثمان فرحت نے کہا کہ عوام کو ریلیف پیکج کے نام پر چوکر ملا آٹا اور اپنے لیے سرکاری گاڑی میں تبدیلیوں اور میچنگ کپڑوں کیلئے تین کروڑ کی گرانٹ ، مریم نواز کی اصلیت دو ہفتوں میں ہی سامنے آنا شروع ہوگئی ہے۔
صحافی واینکر اسامہ غازی کا کہنا تھا کہ جب تھیلے پر نواز شریف کی تصویر ہوگی تو اندر کچھ تو گڑ بڑ ہوگی ہی، ہم انسان ہیں، جانور نہیں، ایسا آٹا جانور بھی نہیں کھائیں گے، عوام کی بس ہوگئی ہے۔
آغا شیخ سرور نے بھی آٹے میں موجود چوکر کی ویڈیوز شیئر کیں اور کہا کہ آدھی قیمت پر جو تھیلے تقسیم کیے جارہے ہیں ان کے اندر چوکر کی بھاری مقدار نظر آرہی ہے، کیا مریم نواز قوم کو بھکاری کے ساتھ ساتھ جانور بھی سمجھتی ہیں۔
ایک صارف نے کہا کہ عوام نے مریم نواز سے کوئی بھیک نہیں مانگی، حکومت نے اپنی مرضی سے آٹا تقسیم کرنے کا کام شروع کیا، مگر اس آٹے کے نام پر عوام کو چوکر دیا جارہا ہے۔
- Featured Thumbs
- https://www.siasat.pk/data/files/s3/sast111.jpg
