خبررساں ادارے جیو نیوز کی جانب سے بلاول بھٹو زرداری کی تقریر کے دوران ن لیگی رہنما عطا تارڑ کو بھرپور کوریج دی گئی ہے، ٹویٹر صارفین نے اس معاملےکو لیول پلیئنگ فیلڈ سے متعلق بلاول کے بیانات سے جوڑ دیا ہے۔
تفصیلات کے مطابق چیئرمین پیپلزپارٹی بلاول بھٹو زرداری آج مظفر گڑھ میں ایک تقریب سےخطاب کررہے تھے، اسی موقع پر ن لیگی رہنما عطاء تارڑ بھی کسی جگہ پر گفتگو فرمارہے تھے۔
تمام خبررساں اداروں نے دونوں تقاریر کو لائیو کوریج دی، تاہم جیو نیوز نے دونوں کو ایک سکرین پر برابر رکھتے ہوئے بلاول بھٹو زرداری کی تقریر کی آواز بند کرکے عطاء تارڑ کو بھرپور کوریج دی۔
سوشل میڈیا صارفین نے جیو نیوز کی جانب سے اس اقدام کو بلاول بھٹو کی جانب سے لیول پلیئنگ فیلڈ سے متعلق دیئے گئے بیانات سے جوڑا اور سوالات اٹھائے۔
پاکستان پیپلزپارٹی کے رہنما فرحان لغاری نے بھی اس معاملے پر ردعمل دیتے ہوئے کہا کہ اشارے بہت ٹائم سے واضح ہیں، تاہم عوام ان کو ایسے نہیں چھوڑے گی، جیو نیوز والے صحافی بنیں چمچے نا بنیں، ایشیاء کے ایک بڑے لیڈر کی آواز بند کرکے ایک نالائق اور چھوٹے آدمی کی آواز اوپن کردی ہے، کچھ شرم کریں۔
صحافی امداد علی سومرو نے جیو نیوز کی اس ویڈیو کلپ کو شیئر کرتے ہوئے کہا کہ ایک طرف ن لیگ کے چوتھے درجے کا جونیئر ترین رہنما اور پی پی چیئرمین، بلاول بھٹو کی آواز بند اور عطاء تارڑ کی کھلی ہے، اشارے بہت واضح ہے۔
صحافی عبید بھٹی نے کہاکہ عمران خان کی آواز بند ہوئی، اس کی جماعت کو کرش کیا گیا اور آپ خوشیاں مناتے رہے، آج آپ کی اپنی جماعت کے چیئرمین کی آواز صرف سکرین مینجمنٹ کیلئے بند ہوئی تو آپ پریشان ہوگئے ہیں، حوصلہ رکھیں۔
رب نواز بلوچ نے کہا کہ ہر تقریر میں بلاول بھٹو جس لیول پلیئنگ کا تذکرہ کرتے ہیں اس کا ثبوت آج جیو پر نظر آگیا، پارٹی چیئرمین کی آواز ایک دوسری پارٹی کے تیسرے درجے کے رہنما کے سامنے بند ہے۔
صحافی فہیم اختر ملک نے کہا کہ ابھی تو آپ کی آواز بند ہے تو چیخیں نکل گئی ہیں، پی ٹی آئی والوں کے نام لینے پر بھی پابندی ہے، اب آپ بھی انجوائے کریں۔
صحافی ثاقب بشیر نے کہا کہ اس میں یہی سبق ہے کہ آواز کسی کیلئے بھی بند نہیں ہونی چاہیے۔
- Featured Thumbs
- https://www.siasat.pk/data/files/s3/4bialwlwawazbndlsjksjks.jpg
