نوری بینڈ کے معروف گلوکار علی نور نے ان پر جنسی ہراسانی کا الزام لگانے والی خاتون صحافی عائشہ بنت راشد سے معافی مانگ لی۔
معروف گلوکار علی نور کو صحافی عائشہ بنت راشد نے ’وحشی‘ قرار دیتے ہوئے ان پر ’جنسی ہراسانی‘ کے الزامات عائد کئے تھے اور انسٹاگرام پر دونوں کے درمیان مبینہ واٹس ایپ میسجز کے سکرین شاٹس شیئر کئے تھے۔
خاتون صحافی کی جانب سے جنسی ہراسانی کے الزامات لگانے کے بعد گلوکار علی نور تنقید کی زد میں آگئے تھے۔سوشل میڈیا پر تنقید کے بعد علی نور نے انسٹاگرام اسٹوری کے ذریعے خاتون صحافی سے معافی مانگی ۔
انہوں نے اپنی انسٹاگرام سٹوری میں لکھا کہ مختلف جوابات پرگہرائی سے غور کرنے کے بعد میں اس نتیجے پر پہنچا ہوں کہ صرف صحیح جواب یہ ہے کہ میں واقعی بہت معذرت خواہ ہوں۔
علی نور نے مزید لکھا میں آپ کے درد کو سمجھ نہیں سکتا لیکن ایک بار پھر معذرت چاہتاہوں۔
انہوں نے مزید کہا کہ میں کوئی بدنیت شخص نہیں ہوں۔ امید کرتاہوں آپ کو میری معافی سے کچھ سکون ملے گا، باقی اللہ مالک
واضح رہے کہ گزشتہ دنوں عائشہ بنت راشد نے سماجی رابطوں کی ویب سائٹ انسٹاگرام پر گلوکار علی نور کیساتھ ہونے والی مبینہ واٹس ایپ چیٹ کے سکرین شاٹس شیئر کرتے ہوئے کہا تھا کہ آپ جنسی طور پر ہراساں کرنے والے انسان ہیں۔ ہوائی اڈے جاتے ہوئے میری گاڑی میں جو کچھ بھی ہوا، وہ جنسی ہراسانی تھا۔
صحافی کی جانب سے شیئر کیے گئے اسکرین شاٹس سے معلوم ہوتا ہے کہ دونوں کے درمیان پرانی شناسائی تھی مگر گلوکار کا رویہ عائشہ بنت راشد کے ساتھ نامناسب تھا۔
اسکرین شاٹس میں عائشہ کو نور کا مبینہ جواب بھی نظر آتا ہے جس میں وہ اس کے “گنہگار” ہونے کا اعتراف کرتے ہیں اور انہیں بتاتے ہیں کہ وہ خود سے نفرت کرتے ہیں۔
خاتون صحافی کی جانب سے واٹس ایپ پر بلاک کیے جانے کے بعد نور نے بظاہر اپنی اہلیہ کے فون نمبر سے عائشہ سے رابطہ کیا۔
علی نور نے اپنے ذاتی انسٹاگرام اکاؤنٹ پر اپنے ‘نانو’ کو لکھے گئے خط میں الزامات کے بارے میں بات کی۔
انہوں نے کہا کہ آج میں نے ویڈیو اور گانے کا ٹیزر اور ریلیز کی تاریخ ڈال دی لیکن جب میں یہ کر رہا تھا، مجھے اخبارات سے ایک پیغام ملا کہ مجھ پر عائشہ کی طرف سے می ٹو کا الزام لگایا گیا ہے۔
علی نور نے اپنی اسٹوری میں یہ بھی بتایا تھا کہ کوئی ایسا نہ سمجھے کہ یہ سب ان کے آنے والے سنگل گانے کی مشہوری کے لیے کیا جا رہا ہے۔ انہوں نے خود پر لگائے گئے الزامات کو نہ صرف جھوٹا قرار دیا بلکہ انہوں نے یہ بھی لکھا کہ ایک طرح سے خواتین کو جلد ہمدردی بھی مل جاتی ہے۔
عائشہ بنت راشد کی جانب سے علی نور پر الزامات لگائے جانے اور گلوکار کی جانب سے انہیں مسترد کیے جانے کے بعد ٹوئٹر پر علی نور کا نام بھی ٹرینڈ کرنے لگا۔
- Featured Thumbs
- https://www.siasat.pk/data/files/s3/ali-noori11hh121.jpg
