فیڈرل انویسٹیگیشن ایجنسی (ایف آئی اے) نے امریکی قونصلیٹ کی شکایت پر کارروائی کرتے ہوئے جعلی دستاویزات کے ذریعے امریکی ویزا حاصل کرنے کی کوشش میں ملوث دو ملزمان کو گرفتار کر لیا ہے۔
ترجمان ایف آئی اے کے مطابق، انسدادِ انسانی اسمگلنگ سرکل کراچی نے امریکی قونصلیٹ کی شکایت پر فوری کارروائی کرتے ہوئے دو ملزمان محمد توصیف خان اور عمران نذیر سلہری کو گرفتار کیا۔ دونوں ملزمان نے امریکی ویزا حاصل کرنے کے لیے جعلی میڈیکل دستاویزات فراہم کیں۔
گرفتار ملزمان کو امریکی قونصلیٹ کے دفتر کے باہر سے گرفتار کیا گیا۔ ابتدائی تفتیش میں انکشاف ہوا کہ ملزمان نے طبی بنیادوں پر امریکی ویزہ حاصل کرنے کے لیے جعلی میڈیکل دستاویزات تیار کیں۔
ایف آئی اے کے مطابق، ملزمان عقیل اور تبسم ضیا نامی ایجنٹوں کے ساتھ رابطے میں تھے۔ تفتیش کے دوران معلوم ہوا کہ عقیل نامی ایجنٹ نے توصیف سے 10 لاکھ روپے میں امریکی ویزا حاصل کرنے کے معاملات طے کیے، جبکہ عمران نذیر نے تبسم ضیاء کے ساتھ 25 لاکھ روپے میں ویزا حاصل کرنے کے لیے معاملات طے کیے تھے۔
ترجمان ایف آئی اے نے بتایا کہ ملزمان نے جعلی دستاویزات کے ذریعے امریکی قونصلیٹ کو گمراہ کرنے کی کوشش کی تھی۔ ملزمان کو گرفتار کر کے تفتیش کا آغاز کر دیا گیا ہے اور ان کی نشاندہی پر مذکورہ ایجنٹوں کے خلاف کارروائی کی جائے گی۔
