بیٹے کیساتھ ایک ہی یونیورسٹی سے ڈگری حاصل کرنیوالی خاتون کی کہانی

یہ کہانی اس ماں کی ہے جس نے اپنے بیٹے کیساتھ ہی ایک ہی یونیورسٹی سے ڈگری حاصل کی۔جس یونیورسٹی سےماں نے ڈاکٹریٹ کی ڈگری حاصل کی اسی یونیورسٹی سے بیٹے نے گریجوایشن کی ڈگری حاصل کی۔

آن لائن ویب سائٹ وی نیوز کے مطابق رفیعہ ناز اپنے آٹھ بہن بھائیوں میں سب سے بڑی ہیں۔ ان کی شادی فرسٹ ایئر کے دوران اپنے کزن سے ہوئی، مگر انہوں نے اپنی تعلیمی جستجو جاری رکھی۔

شادی کے بعد ایف ایس سی مکمل کرکے بی ایس سی میں داخلہ لیا۔ بی ایس سی کے نتائج آنے سے پہلے ان کی پہلی بیٹی پیدا ہوئی، لیکن انہوں نے گومل یونیورسٹی سے بیچلر اور ماسٹرز کی ڈگریاں حاصل کرنے کا عزم برقرار رکھا۔

بعدازاں، رفیعہ نے پبلک سروس کمیشن کا امتحان پاس کرکے سینئر سائنس ٹیچر کی حیثیت سے کیریئر کا آغاز کیا۔ 1998 میں انہوں نے پولیٹیکل سائنس میں ماسٹرز کیا، جس دن ان کا وائیوا تھا، اسی دن ان کے بیٹے عبدالرحیم کی ولادت ہوئی۔ امتحان کے لیے ممتحن کو اسپتال آنا پڑا۔

رفیعہ نے 2012 میں انٹرنیشنل ریلیشنز اور ویمن اینڈ جینڈر اسٹڈیز میں ماسٹرز مکمل کیا۔ ایم فل کے دوران ان کی دو بیٹیاں بی ایس کر رہی تھیں، جو ان کے لیے ایک یادگار لمحہ تھا۔ 2019 میں ان کے بیٹے عبدالرحیم نے لا میں داخلہ لیا، اور اسی وقت رفیعہ نے بھی اسی یونیورسٹی سے پی ایچ ڈی کا آغاز کیا۔ جولائی 2024 میں انہوں نے پی ایچ ڈی کا ڈیفنس کیا، اور ستمبر 2024 میں ماں اور بیٹے نے ایک ہی یونیورسٹی سے اپنی ڈگریاں حاصل کیں۔

ڈاکٹر رفیعہ اپنی کامیابی کا سہرا اپنے والد کی بے پناہ سپورٹ کو دیتی ہیں۔

رفیعہ نے 2008 سے 2014 تک برٹش کونسل کے "کونیکٹنگ کلاس رومز" پروجیکٹ میں ایبٹ آباد کلسٹر کی کوآرڈینیٹر کی حیثیت سے خدمات انجام دیں۔ اس دوران اسامہ بن لادن کے واقعے کے بعد ایک پارٹنر آرگنائزیشن نے ایبٹ آباد کی وجہ سے ان کے ساتھ کام کرنے سے انکار کیا۔ ڈاکٹر رفیعہ نے اس مسئلے کو مضبوطی سے حل کیا اور برٹش کونسل کی مدد سے پروجیکٹ مکمل کیا۔ اس دوران انہوں نے انگلینڈ کے پانچ دورے کیے۔

انگلینڈ حکومت نے ڈاکٹر رفیعہ کو کاؤنٹی درہم کے تحت کیس اسٹڈی کے طور پر منتخب کیا اور 2014 میں انہیں "بریچ شاک اسکالرشپ ایوارڈ" سے نوازا۔

آج ڈاکٹر رفیعہ ڈائریکٹوریٹ آف کریکیولم، اخلاقیات، بین المذاہب ہم آہنگی، اور جینڈر ایشوز پر کام کر رہی ہیں۔ 2019 میں انہوں نے یوتھ ڈیلیگیشن کے ساتھ سری لنکا کا دورہ بھی کیا۔

ڈاکٹر رفیعہ ناز کی کہانی تعلیم، عزم، اور مسلسل محنت کی بہترین مثال ہے۔