بیرسٹر علی ظفر نے آرمی ایکٹ کےتحت کارروائی سے متعلق اپنے بیان کی وضاحت دیدی
پاکستان تحریک انصاف کے سینیٹر بیرسٹر علی ظفر نے آرمی ایکٹ کے تحت کارروائی سے متعلق اپنےبیان کی وضاحت دیدی ہے۔
مائیکروبلاگنگ ویب سائٹ ٹو یٹر پر جاری اپنے بیان میں بیرسٹر علی ظفر نے کہا کہ کسی بھی ہنگامہ آرائی یا فسادات کے نتیجے میں سرکاری املاک کو نقصان پہنچانے والوں کے خلاف مقدمات ملٹری کورٹس کےبجائے عام فوجداری عدالتوں میں چلائے جاسکتے ہیں۔
انہوں نے مزید کہا کہ آرمی ایکٹ کے تحت کوئی بھی کارروائی آئین و شفاف ٹرائل کی کھلی خلاف ورزی ہوگی۔
پاکستان تحریک انصاف کے رہنما اور سابق ترجمان وزارت خزانہ مزمل اسلم نے بیرسٹر علی ظفر کی ٹویٹ کو شیئر کرتےہوئے کہا کہ وضاحت آگئی ہے، ہمارا میڈیا پورا دن ان کے بیان کو سیاق و سباق سے ہٹ کر پیش کرتا رہا ہے۔
خیال رہے کہ آج میڈیا میں بیرسٹر علی ظفرکے حوالے سے یہ خبر گردش کررہی تھی کہ انہوں نے فوجی تنصیبات پر حملہ کرنیوالوں کے خلاف آرمی ایکٹ کے تحت کارروائی کو درست قرار دیا ہے اور کورکمانڈر ہاؤس وآرمی کی دیگر تنصیبا ت کو نقصان پہنچانے کی شدید مذمت بھی کی ہے۔
ان میڈیا رپورٹس میں بیرسٹر علی ظفر کے لاہور ہائی کورٹ کےباہر میڈیا سے گفتگوکا حوالہ دیتے ہوئے کہا گیا کہ بیرسٹر علی ظفر نے کہا ہے کہ اگر کوئی سویلین پاک فوج کی تنصیبات پر حملہ کرے تو اس کے خلاف آرمی ایکٹ کے تحت مقدمہ ہوسکتا ہے، ہمیں تشدد زدہ احتجاج کی حمایت نہیں کرنی چاہیے، میں نے عمران خان کے سامنے بھی اس واقعہ کی شدید مذمت کی ہے۔
