بلاول بھٹو زرداری نے تمام فارم 45 شیئر کردیئے، کیا نواز شریف و مریم بھی یہ حوصلہ کریں گے؟ سوشل میڈیا صارفین کا سوال
پاکستان پیپلزپارٹی کے چیئرمین بلاول بھٹو زرداری نے لاڑکانہ کے حلقہ این اے194کے انتخابی نتائج سے متعلق تمام پولنگ اسٹیشنز کے فارم 45 ٹویٹر پر شیئر کردیئے ہیں۔
تفصیلات کے مطابق بلاول بھٹو کی جانب سے جاری کردہ ایک بیان میں کہا گیا ہے کہ میرے ایک مخالف امیدوار نے دعویٰ کیا ہے کہ لاڑکانہ سے میری جیت دھاندلی زدہ ہے، میں نے اس حلقے کے تمام پولنگ اسٹیشنز کے فارم 45 شیئر کردیئے ہیں، پیپلزپارٹی نےجمہوریت کیلئے اپنی قیادت اور ورکرز کے خون کی قربانیاں دی ہیں۔
انہوں نے مزید کہا کہ انتخابات میں دھاندلی کے الزامات کو سنجیدگی سے لیا جانا چاہیے، جو جھوٹے دعوے کرتے ہیں وہ تمام سچے دعویداروں کے ساتھ ناانصافی کرتے ہیں، میں اپنے خلاف جھوٹے الزامات عائد کرنے والوں کے خلاف قانونی چارہ جوئی کروں گا۔
بلاول بھٹو نے اپنے حلقہ کے تمام فارم 45 شیئر کیے اور فارم 47 کے مطابق نتائج کا حوالہ دیتے ہوئے کہا کہ میں نے مخالف امیدوار سے1 لاکھ ووٹوں کی لیڈ لی ہے، شکست کو تسلیم کیے بغیر جھوٹ بولنا شرمناک ہے۔
بلاول بھٹو زرداری کی جانب سے تمام پولنگ اسٹیشنز کے فارم 45 شیئر کرنے پر سوشل میڈیا صارفین نے ملے جلے ردعمل کا اظہار کیا ،ایک صارف نےسوال کیا کہ کیا نواز شریف اور مریم نواز بھی یہ حوصلہ پیدا کرسکتی ہیں کہ وہ اپنے حلقے کے تمام فارم 45 شیئر کرسکیں۔
عدیل اظہر نے پوچھا کہ کیا آپ کراچی میں پیپلزپارٹی کی جانب سے جیتی گئی تمام نشستوں کے فارم 45 بھی اسی طرح شیئر کرسکتے ہیں۔
ذیشان خٹک نے کہا کہ ہمت کریں اور پیپلزپارٹی کے تمام قومی و صوبائی اسمبلی کے کامیاب امیدوار اپنے فارم 45 ٹویٹر پر اپلوڈ کریں، کم از کم ملتان کے حلقوں کے تو ضرور دکھائیں، آپ ہمیشہ قانون و آئین کی بالادستی کا جھوٹا دعویٰ کرتے ہیں، آپ نے دھاندلی زدہ ن لیگ کے ساتھ حکومت میں شامل ہوکر بھٹو خاندان کی عزت کو تار تار کردیا۔
گوہر حسن نے فرمائش کرتے ہوئے کہا کہ آپ نے لاہور سے جو الیکشن لڑا تھا اس حلقے کے فارم 45 بھی شیئر کردیں۔
عابد شفقت نے لکھا کہ ہم بینظیر کے زمانے تک جیالےتھے، اگر آپ لاہور والے حلقےکے فارم 45 لگادیں تو خان کو چھوڑ کر آپ کی بیعت کرکے مرشد بنالیں۔
- Featured Thumbs
- https://www.siasat.pk/data/files/s3/11for45tfash.png
