پاکستان ٹیم کے اوپننگ بیٹسمین احمد شہزاد کو بابراعظم پر الزام لگانا مہنگا پڑگیا، احمد شہزاد کو بابراعظم پر دوستوں کو ٹیم میں کھلانے کا الزام لگانے پر شدید تنقید کا سامنا ہے۔
تفصیلات کے مطابق ایک نجی ٹی وی چینل کے پروگرام میں امام الحق اور احمد شہزاد کے درمیان بابراعظم کی کپتانی اور ٹیم سیلکشن کے حوالے سے بحث شروع ہوئی ، اس دوران احمد شہزاد نے بابراعظم پر تنقید کی تو امام الحق نے بابر کا دفاع کرنے کی کوشش کی۔
اسی بحث کے دوران احمد شہزاد نے کہا کہ بابراعظم اپنے دوستوں کو ٹیم میں کھلارہے ہیں جو پرفارم بھی نہیں کرپارہے۔ اس پر امام الحق نے کہا کہ میں بھی بابراعظم کے دوستوں میں شمار ہوتا ہوں مگر مجھے ٹی 20 ورلڈ کی ٹیم میں شامل نہیں کیا گیا۔
امام الحق نے مزید کہا کہ بابراعظم نے بورڈ سے نہیں کہا تھا کہ مجھے قیادت کے فرائض دیئے جائیں انہیں بورڈ نے دوبارہ کپتان بنایا، کپتانی دینے اور لینے کا اختیار بورڈ کے پاس ہے۔
پروگرام کے میزبان نے کہا کہ محمد عامر اور عماد وسیم کی بابر سے دوستی نہیں ہے، عامر نے تو ایک موقع پر بابراعظم پر تنقید بھی کی تھی مگر وہ بھی آج ٹیم میں کھیل رہے ہیں۔
احمد شہزاد نے جواب دیا کہ وہ دونوں اس لیے کھیل رہے ہیں کیونکہ ان دونوں کے رابطے بورڈ کے اعلیٰ عہدیداران سے ہیں، انہی لوگوں نے عامر اور عماد وسیم کو ٹیم میں واپس بلوایا ہے۔
قومی کرکٹ ٹیم کے کپتان بابراعظم پر اس الزام کے بعد احمد شہزاد کو سوشل میڈیا صارفین اور کرکٹرز کی جانب سےآڑے ہاتھوں لیا جارہا ہے۔
- Featured Thumbs
- https://www.siasat.pk/data/files/s3/8ahmajsjshhakdjsjsj.png
