آئی ایم ایف شرط کے بعد شرح سود میں کتنے فیصد اضافے کاامکان؟

مرکزی بینک نے کہا ہے کہ شرح سود کو 2 فیصد تک بڑھایا جا سکتا ہے۔ اس حوالے سے اسٹیٹ بینک آف پاکستان نے ایک اعلامیہ جاری کیا ہے، جس میں کہا گیا ہے کہ آئی ایم ایف شرط کے بعد شرح سود کو 2 فیصد تک مزید بڑھانے کا فیصلہ ہو سکتا ہے۔

تفصیلات کے مطابق اسٹیٹ بینک اعلامیے میں کہا گیا ہے کہ اسٹیٹ بینک مانیٹری کمیٹی کی میٹنگ 2 مارچ کو ہوگی، اس سے قبل مانیٹری کمیٹی کی میٹنگ 16 مارچ کو طے تھی۔

یاد رہے کہ گزشتہ ماہ 23 جنوری کو بھی مرکزی بینک نے شرح سود میں ایک فیصد اضافے کا اعلان کر کے سود کی شرح 16 سے 17 فی صد کر دی تھی۔

گورنر اسٹیٹ بینک جمیل احمد نے کہا تھا کہ قرضوں کی ادائیگی کی وجہ سے زر مبادلہ ذخائر کم ہوئے ہیں، مہنگائی پر قابو پانے کے لیے شرح سود میں اضافہ کیا گیا، مہنگائی سے اوورسیز کے اخراجات بڑھتے ہیں اور اثر ترسیلات زر پر بھی پڑتا ہے۔

سابق چیئرمین ایف بی آر شبرزیدی کے مطابق آئی ایم ایف کو خوش کرنے کے لیے شرح سود میں اضافہ کیا گیا، اس سے کاروبار مزید تباہ ہوں گے۔