انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ کے قوانین میں تبدیلیوں کا اعلان کر دیا۔تفصیلات کے مطابق اس ضمن میں انٹرنیشنل کرکٹ کونسل نے اعلامیہ بھی جاری کر دیا ہے۔
جاری کردہ اعلامیے میں بتایا گیا ہے کہ آئی سی سی نے پہلی مرتبہ ٹی ٹوئنٹی ورلڈ کپ کے دوران پلیئنگ کنڈیشنز کو تبدیل کرتے ہوئے شق 11 میں پانی کا وقفہ کرانے کی اجازت دیدی ہے، یہ وقفہ ہر اننگز کے عین درمیان میں ہوگا یعنی وقفہ 10 اوورز کے اختتام پر ہوگا جو 2 منٹ 30 سیکنڈز کا ہو گا تاہم اگر ایک اننگز 14 اوورز یا اس سے کم تک محدود ہوئی تو پانی کا وقفہ نہیں ہوگا۔
پانی کے اس وقفے کے دوران اسٹریٹیجک ٹائم آؤٹ کی طرز پر ہیڈ کوچز کو کھلاڑیوں کے ساتھ گفتگو کی اجازت ہوگی۔
اس کے علاوہ آئی سی سی نے فیصلہ کیا ہے کہ اس سال مردوں کے ٹی 20 ورلڈ کپ کی تاریخ میں پہلی بار ڈی آر ایس استعمال کیا جائے جبکہ ڈک ورتھ لوئیس میتھڈ کیلئے بھی قوانین میں بھی ترمیم کی گئی ہے، ڈی آر ایس کے تحت ہر ٹیم کے پاس دو ، دو ری ویو چانس ہوں گے۔
آئی سی سی نے بارش سے متاثرہ میچز کے لئےقوانین میں بھی معمولی تبدیلی کی ہے، عام میچز میں تو بارش سے متاثرہ کھیل کا نتیجہ پانے میں دوسری اننگز میں کم از کم 5 اوورز کا کھیل ہی لازمی ہوگا لیکن سیمی فائنل اور فائنل میں دوسری اننگز میں کم از کم 10اوورز کا کھیل لازمی قرار دیا ہے۔
آئی سی سی پلیئنگ کنڈیشنز کے مطابق میچ ٹائی ہونے کی صورت میں سپر اوور ہوگا اور سپر اوورز کا سلسلہ تب تک جاری رہے گا جب تک فاتح ٹیم کا فیصلہ نہیں ہوتا۔
انٹرنیشنل کرکٹ کونسل کے ترمیم شدہ قوانین کے مطابق سیمی فائنل مکمل نہ ہونے کی صورت میں جو ٹیم سپر اوور میں بہتر پوزیشن پر ہوگی وہ فائنل میچ کھیلنے کی حقدار قرار پائے گی جبکہ فائنل کسی بھی صورت مکمل نہ ہونے پر دونوں فائنلسٹ ٹیمیں مشترکہ فاتح قرار پائیں گی۔
واضح رہے کہ ٹی ٹوئنٹی ورلڈ کپ 17 اکتوبر سے عمان اور متحدہ عرب امارت میں شروع ہورہا ہے، جبکہ ٹی 20 ورلڈ کپ میں روایتی حریف پاکستان اور بھارت 24 اکتوبر کو دبئی انٹرنیشنل اسٹیڈیم میں آمنے سامنے آئیں گے۔
- Featured Thumbs
- https://i.ibb.co/tHL5Ydr/blg.jpg
