امریکہ میں ایئر شو کے دوران جنگ عظیم دوم کے دوفوجی طیارے آپس میں ٹکرا کر تباہ ہوگئے ہیں، واقعہ میں 6 افراد کے جاں بحق ہونےکی اطلاعات ہیں۔
امریکی خبررساں ادارے کی رپورٹ کے مطابق امریکی ریاست ڈیلاس کےایگزیکٹیو ایئرپورٹ پر فوجی دن کی مناسبت سے یادگاری ایئر شو کا انعقاد کیا گیا جس میں جنگ عظیم دوم میں شرکت کرنے والے فوجی طیاروں نے فضائی کرتب دکھائے۔
ایئر شو میں کئی طیارے شامل تھے جنہیں اڑانے والے پائلٹ اپنے کرتب دکھارہے تھے، تاہم ایئر شو کے دوران بوئنگ بی -17 موڑ کاٹتے ہوئے عقب میں آنے والے طیارے بیل پی -63 کنگ کوبرافضا سے ٹکراگیا ۔
دونوں طیاروں کے ٹکراؤں کے نتیجے میں ایک طیارے کے دونوں بازو ٹوٹ گئے اور طیارہ بے قابو ہوکر زمین کی طرف آیا اور زمین بوس ہوگیا، دوسرا طیارہ حادثے کے بعد ہوا میں ہی مکمل تباہ ہوگیا، اس ہولناک حادثے کو ایئر شو کی کوریج کیلئے موجود کیمروں نے ہمیشہ کیلئے محفوظ کرلیا، واقعہ کی ویڈیو سوشل میڈیا پر وائرل ہوگئی ہے۔
ویڈیو میں دیکھا جاسکتا ہے کہ زمین پر گرنے والے طیارے میں خوفناک آگ بھڑک اٹھی،حادثے میں مجموعی طور پر اب تک 6افراد کے جاں بحق ہونے کی خبریں ہیں ، تاہم سرکاری سطح پر ان خبروں کی تصدیق یا تردید نہیں کی گئی، تاہم الائیڈ پائلٹس نے طیارے میں بطور کریو ممبر موجود اپنےدو سابقہ پائلٹس کی ہلاکت کی تصدیق کی ہے۔
