وفاقی حکومت نے الیکٹرانک ووٹنگ مشین کو ہیک کرنے والوں کو چیلنج کرتے ہوئے کہا ہے کہ اگر کوئی ایسا کرلے تو اسے بڑا انعام دیا جائے گا۔
وفاقی حکومت کی جانب سے یہ اعلان نجی ٹی وی چینل اے آروائی نیوز کے پروگرام"پاورپلے" میں شریک وفاقی وزیر سائنس و ٹیکنالوجی شبلی فراز نے کیا اور کہا کہ اگر کوئی حکومت کی جانب سے تیار کردہ ای وی ایم مشین کو ہیک کرلے تو اسے 10 لاکھ روپے کا انعام دیا جائے گا۔
شبلی فراز نے مزید کہا کہ ہم نے مشین کی ٹیسٹنگ کے دوران کئی ہیکرز کو بلوا کر مشین کو ہیک کرنے کا کہا مگر باوجود کوشش کے کوئی بھی ای وی ایم مشین کو ہیک نہ کرسکا، ہم نے ہیکرز کو 10 لاکھ روپے انعام کا لالچ بھی دیا مگر کسی کو کامیابی نہیں ملی۔
وفاقی وزیر سائنس و ٹیکنالوجی نے کہا کہ ہم نے اپوزیشن سے درخواست کی کہ ایک بار آکر مشین کا جائزہ لے مگر اپوزیشن نے مشین دیکھی تک نہیں، ہمارے اتحادیوں کو بھی اس مشین پر تحفظات تھے ہم نے وہ بھی دور کیے، اپوزیشن کو بھی ہر طرح سے اس معاملے پر مطمئن کرنے کی کوشش کی گئی مگر یہ نہیں مانے۔
شبلی فراز نے کہا کہ محدود وسائل میں رہتے ہوئے مشین بنائی جس میں بیٹری نصب ہے اور یہ 24 گھنٹے کام کرتی ہے، اپوزیشن شروع سے ہی ٹیکنالوجی کے استعمال کی مخالفت کرتی ہے۔
انہوں نے کہا کہ ہر پارٹی کا حق ہے کہ وہ کسی بھی معاملے پر اپنی رائے دے، مگر اس معاملے میں مخالفت سے ثابت ہوتا ہے کہ اپوزیشن ماضی کی طرح کے ہی انتخابات چاہتی ہے۔
دوسری جان پاکستان الیکٹرونک ووٹنگ مشین استعمال کرنے والے ممالک کی فہرست میں شامل ہوگی۔ امریکا سمیت 8 ممالک میں الیکٹرونک ووٹنگ مشین (ای وی ایم) کا استعمال جاری ہے، امریکا، آسٹریلیا، بیلجیئم اور بھارت میں ای وی ایم کا استعمال ہوتا ہے۔
بھارت میں الیکٹرونک ووٹنگ مشین کا استعمال 1982 سے ہورہا ہے، برازیل، ایسٹونیا، فلپائن اور وینزویلا میں بھی ای وی ایم کا استعمال جاری ہے۔
- Featured Thumbs
- https://www.siasat.pk/data/files/s3/evm-chack1.jpg
Last edited by a moderator:
