بھارت نے امریکی کانگریس کی رکن الہان عمر کے پاکستان کے دورے کو 'تنگ نظر' سیاست قرار دیا ہے۔ الہان پاکستان کے چار روزہ دورے پر ہیں، جہاں انہوں نے وزیر اعظم شہباز شریف اور سابق وزیر اعظم عمران خان سے ملاقات کی۔
امریکہ کی معروف قانون ساز الہان عمر نے جمعرات کے روز پاکستان کے زیرانتظام کشمیر کا دورہ کیا تھا۔ اس متنازعہ علاقے میں کسی امریکی قانون ساز کا اس انداز کا یہ ایک غیر معمولی دورہ تھا، جس پر بھارت نے شدید رد عمل کا اظہار کرتے ہوئے اس کی سخت الفاظ میں مذمت کی۔
بھارتی وزارت خارجہ کے ترجمان ارندم باغچی نے کہا، "ہم نے اس بات کا نوٹس لیا ہے کہ انہوں نے مرکز کے زیر انتظام جموں اور کشمیر کے اس بھارتی حصے کا دورہ کیا ہے جو پاکستان کے پاس ہے، میں صرف اتنا کہوں گا کہ اگر ایسی سیاست دان اپنی تنگ نظری کی سیاست کرنا چاہیں تو یہ ان کی اپنی مرضی ہے''
ان کا مزید کہنا تھا، "ہماری علاقائی سالمیت اور خود مختاری کی خلاف ورزی اس (مسئلے کو) کو ہمارا اپنا بناتی ہے، اور ہم سمجھتے ہیں کہ یہ دورہ قابل مذمت ہے۔''
ادھر امریکہ کا کہنا ہے کہ ڈیموکریٹک پارٹی سے تعلق رکھنے والی کانگریس کی رکن الہان عمر کا اس ہفتے کا دورہ پاکستان امریکی حکومت کی طرف سے اسپانسرڈ نہیں ہے۔
امریکی وزارت خارجہ کے ترجمان نیڈ پرائس نے اپنی روزانہ کی نیوز کانفرنس میں اس حوالے سے ایک سوال کے جواب میں کہا، ''جہاں تک میں سمجھتا ہوں، نمائندہ الہان عمر امریکی حکومت کے زیر اہتمام پاکستان کا دورہ نہیں کر رہی ہیں۔ اگر پھر بھی کسی کو جواب چاہیے تو وہ براہ راست ان سے رابطہ کرے۔
یا رہے کہ جمعرات کے روز الہان عمر نے آزاد کشمیر کا دورہ کرنے کے بعد صحافیوں سے بات چیت میں کہا تھا، ”میرا نہیں خیال کہ جس حد تک کشمیر کے موضوع پر امریکی کانگریس میں بات ہونی چاہیے اتنی بات بات چیت کبھی بھی ہوئی ہے، بلکہ امریکی انتظامیہ کے ساتھ بھی اس موضوع پر زیادہ گفتگو نہیں ہوئی ہے۔''
- Featured Thumbs
- https://www.siasat.pk/data/files/s3/sazi1wh2h112.jpg
